Венгрияда маст эркак самолётни ўғирлаб, атом электр стансияси томон учди (видео)
Венгрияда маст ҳолатдаги 24 ёшли йигит учувчилик ва ҳайдовчилик гувоҳномасига эга бўлмаган ҳолда "Сессна 172" русумли енгил самолётни ўғирлаб, Пакс атом электр стансияси (АЕС) томон учган. Бироқ бир неча дақиқадан сўнг самолёт далага қулаган. Бу ҳақда Gazeta.ru хабар берди.
Воқеа 29-август куни эрталаб Венгриянинг Калоча шаҳрида содир бўлган. Роберт исмли йигит аеродромга кириб, "Сессна 172" самолётини ўғирлаган. Венгрия полициясининг маълумотларига кўра, у самолётни ерга маҳкамлаб турган арқонларни узиб, ҳавога кўтарилган.
Самолёт Пакс АЕС атрофидаги ҳаво ҳудудига кириб, стансия яқинида "хавфли манёврлар"ни амалга оширган. Фуқаролик самолётларининг АЕСга 3 километрдан яқинлашиши ва унинг устида 6 минг метргача баландликда учиши тақиқланган. Шу сабабли, шунингдек, самолёт ўғирлангани учун Венгрия Мудофаа вазирлиги икки ЖАС 39 Грипен қирувчисини ҳавога кўтарган.
Орадан бир неча дақиқа ўтиб, "Сессна" Керен қишлоғи яқинидаги кунгабоқар даласига фавқулодда қўнган. Қўниш вақтида самолётнинг шассиси синиб, фюзеляжи ён томонга ағдарилган. Қирувчилар шикастланган самолётни аниқлаб, қутқарувчилар етиб келгунига қадар воқеа жойи устида қолган. Маълум бўлишича, маст йигит қаттиқ қўниш оқибатида жароҳатланмаган. Бошқа жабрланганлар ҳам бўлмаган.
Самолётдан тушган Роберт яқин атрофдаги 512-сонли автомобил йўлига чиққан. Йўлдан ўтаётган ҳайдовчилардан бири йигитни кўриб, ёрдам бериш учун тўхтаган. Бироқ Роберт ёрдам таклифини қабул қилиш ўрнига унинг автомобилини ўғирлашга уринган. Ҳайдовчи уни тўхтатиб, полицияни чақирган. Шундан сўнг йигит қўлга олинган.
Роберт шифохонага олиб борилгани сабабли полиция уни фақат эртаси куни сўроқ қилган. Текширув унинг спиртли ичимлик таъсирида бўлганини кўрсатган. Ҳуқуқ-тартибот идоралари у бошқа моддаларни ҳам истеъмол қилган-қилмаганини текширмоқда. Роберт полицияга самолётни ўғирлаб, учганини умуман эсламаслигини, чунки жуда маст бўлганини айтган. Унга нисбатан транспорт воситаларини ноқонуний эгаллаб олиш каби бир қатор моддалар бўйича тергов бошланган. Унинг ҳибсга олиниши масаласи яқин кунларда ҳал қилинади.