Парвозда 90 метрга пастлаб кетган самолёт учувчиси наркотик чеккани маълум бўлди (видео)

**Парвоз вақтида 90 метрга тушиб кетган самолёт учувчиси гиёҳванд модда истеъмол қилгани маълум бўлди (видео)**

Блоомберг агентлигининг манбаларга таяниб хабар беришича, Ҳиндистоннинг Аир Индиа авиакомпанияси самолётини бошқарган учувчилардан бири парвоз пайтида гиёҳванд моддалар таъсирида бўлганлиги аниқланган.

Воқеа 4-август куни Пхукетдан Ню Деҳлига учаётган Аирбус А320нео самолёти билан содир бўлган. Самолёт турбулентлик зонасига тушиб қолгач, баландлигини бирданига қарийб 90 метрга пасайтирган. Бортда 137 нафар йўловчи ва саккиз нафар экипаж аъзоси бўлган. Ҳодиса натижасида 20 нафар йўловчи ва тўрт нафар экипаж аъзоси Ҳиндистон пойтахтига қўнгач, касалхонага ётқизилган.

Самолётни бошқарган ҳар икки учувчи психоактив моддалар бўйича тест топширган. Дастлабки тест натижасида учувчилардан бирида ижобий кўрсаткич аниқланган. Кейинчалик ўтказилган такрорий тест ҳам ижобий натижа берган.

Ҳиндистон Фуқаро авиацияси вазирлиги тергов давом этаётганини маълум қилди. Вазирлик қоидаларига кўра, биринчи ижобий тест натижасидан сўнг қоидабузар реабилитация дастурига юборилади. Парвоз қилиш ҳуқуқини тиклаш учун у қайта тест топшириб, салбий натижа олиши керак. Такрорий ижобий натижа қайд этилса, учувчининг лицензияси уч йилга тўхтатилади. Учинчи ижобий натижа эса лицензиянинг бутунлай бекор қилинишига олиб келади.

Аввалроқ Канадада бола хавфсизлик камарини тақишдан бош тортгани сабабли самолёт парвози бекор қилинган эди. Шунингдек, Малайзиядан Ҳиндистонга учаётган эркак самолётнинг фавқулодда чиқиш эшигини очишга уринган. Ҳодиса юз берган пайтда учоқ 9 минг метр баландликда бўлган. Якунда экипаж аъзолари ва бошқа йўловчилар уни зарарсизлантириб, қўлларини боғлаб қўйган. Полиция томонидан сўроқ қилинганида эркак ўз хатти-ҳаракатларини ўша лаҳзада шундай қилгиси келгани билан изоҳлаган.