UzAuto Motors хусусийлаштирилиши қайси босқичда ва қайси мамлакатлар компаниялари уни сотиб олишга қизиқиш билдирмоқда

UzAuto Motors хусусийлаштирилиши кайси босқичда ва сотиб олишга қайси мамлакатлар компаниялари қизиқиш билдирмоқда

АҚШ, Жанубий Корея ва Хитой компаниялари UzAuto Motors ва UzAuto Motors Powertrain’ни хусусийлаштиришга қизиқиш билдирди. Бу ҳақда 8 октябрь куни бўлиб ўтган матбуот анжуманида Давлат активларини бошқариш агентлиги (ДАБА) директори Соҳибжон Муродов маълум қилди.

UzAuto Motors’нинг хитойлик инвесторга сотилиши мумкинлиги ҳақидаги саволга жавоб берар экан, у шундай деди:

«Бугунги кунда бизга таклифлар тушмоқда. Хусусан, Америка, Жанубий Корея ва Хитой компаниялари қизиқиш билдирди».

Шу билан бирга, ДАБА раҳбари потенциал харидорларнинг баёнотларини корхонани аллақачон улардан бирига топширишга қарор қилинганининг белгиси деб ҳисобламасликка чақирди.

«Жамоатчиликка ва UzAuto Motors хусусийлаштирилишига қизиқаётганларнинг барчасига етказишингизни сўраган бўлардим: агар қайсидир компания бугун корхонани сотиб олмоқчи эканини айтса, бу биз уни айнан шу компанияга сотамиз дегани эмас», — деб таъкидлади Муродов.

Унинг сўзларига кўра, бундай тахминлар рақобатни ёмонлаштириши мумкин, чунки улар бошқа иштирокчиларда бўлажак савдолар шартлари ҳақида нотўғри тасаввур пайдо қилишга қодир.

«Жараён бирор-бир алоҳида компанияга йўналтирилмаган. Бу очиқ халқаро савдолар бўлади», — деди агентлик раҳбари.

Муродов қизиқиш билдирган компаниялар номини айтмади ва улардан расмий таклифлар тушгани ёки гап дастлабки мурожаатлар ҳақида кетаётганига аниқлик киритмади.

ДАБА директори UzAuto Motors ва UzAuto Motors Powertrain’ни сотишга тайёргарлик тахминан икки йил олдин бошланганини маълум қилди.

Унинг сўзларига кўра, 2025 йилда хусусийлаштиришдан олдинги тайёргарлик учун танлов асосида халқаро консалтинг компанияси жалб қилинган. У таҳлилий материаллар тайёрлаш, текширувлар ўтказиш ва хусусийлаштириш бўйича таклифлар ишлаб чиқиш билан шуғулланмоқда.

«Биз бу компанияни танладик, чунки бир қатор бошқа халқаро консультантлардан фарқли ўлароқ, у жаҳон автомобиль бозоридаги йирик битимларни тузишда иштирок этган, бу соҳани яхши билади ва тегишли мутахассисларга эга», — деб тушунтирди Муродов.

Ҳозирда, унинг сўзларига кўра, агентлик хусусийлаштириш сценарийсини, жумладан, босқичлар кетма-кетлиги ва уларни ўтказиш муддатларини ишлаб чиқмоқда.

Кейинги қадам бевосита савдоларни ташкил этиш учун халқаро консультантни танлаш бўлиши керак. Сўнгра активларни халқаро баҳолаш ва комплекс текширув (due diligence) кўзда тутилган.

Бундан кейин ДАБА халқаро ахборот каналлари, шунингдек, Ўзбекистон ва хорижий ОАВ орқали сотув ҳақида эълон қилишни режалаштирмоқда.

«Инвесторлар қизиқиш билдирганидан сўнг, уларни текшириш ўтказилади. Кейин биз мажбурий бўлмаган таклифларни, кейинги босқичда эса мажбурий таклифларни оламиз. Шундан сўнг энг яхши таклифларни тақдим этган инвесторлар билан музокаралар бошланади», — деб хабар берди агентлик раҳбари.

Муродов музокаралар давомида нафақат таклиф этилган нарх, балки давлатнинг талаблари, жумладан, амалдаги лицензия шартлари, уларнинг амал қилиш муддатлари ва альянс келишувлари қоидалари ҳам ҳисобга олинишини таъкидлади.

«Бир қатор шартлар бор ва уларнинг барчаси эълон қилинади. Улар асосида музокаралар олиб борилади, сотув бориши ҳақидаги маълумотлар эса эълон қилиб борилади», — деди у.

Шу билан бирга, ДАБА раҳбари савдолар айнан қачон бошланиши, давлат сотувдан қанча олишни мўлжаллаётгани ва икки корхона биргаликда ёки алоҳида реализация қилинишига аниқлик киритмади.

Гап UzAuto Motors акцияларининг 99,7 фоизини ва UzAuto Motors Powertrain акцияларининг 100 фоизини сотиш ҳақида бормоқда.

UzAuto Motors Chevrolet бренди остида автомобиллар ишлаб чиқариш билан шуғулланади. Компания корхоналари Андижон ва Хоразм вилоятларида жойлашган.

UzAuto Motors Powertrain 2008 йилдан бери Тошкент шаҳрининг Сергели туманида автомобиль саноати учун двигателлар ва бошқа куч агрегатларини ишлаб чиқаради.

Spot хабар беришича, хусусийлаштириш рақобат асосида ўтказилади ва унда қонунчилик талабларига жавоб берадиган ҳар қандай инвестор иштирок этиши мумкин бўлади.

Идорада таъкидланишича, алоҳида компанияларга, жумладан, Американинг General Motors компаниясига активни сотиб олишда преференциялар ёки имтиёзли ҳуқуқ берилмайди.

Сотишнинг якуний стратегияси, шу жумладан икки корхонани бир лот билан реализация қилиш мумкинлиги ҳақидаги масала халқаро консультантнинг таклифларини ҳисобга олган ҳолда белгиланиши керак.

Бўлажак хусусийлаштиришнинг масалаларидан бири Американинг General Motors компанияси билан тузилган битимларнинг кейинги амал қилиши бўлиб қолмоқда.

UzAuto Motors’нинг инвесторлар учун 2025 йил ноябрь ойидаги меморандумига кўра, «Узавтосаноат» ва General Motors ўртасида 2017 йил октябрь ойида тузилган альянс битими муддатсиз амал қилади. Шу билан бирга, GM’нинг технологик лицензияси 2017 йилдан 2027 йилгача бўлган даврга мўлжалланган. Ҳужжатда ҳамкорлик ва унинг ҳозирги шартлари келгусида сақланиб қолиши кафолатланмагани қайд этилган.

General Motors лицензияси компанияга Америка концернининг муайян автомобиль моделларини ишлаб чиқариш, тегишли товар белгилари ва технологиялардан фойдаланиш, шунингдек, келишилган бозорларда автомобилларни сотиш ҳуқуқини беради. Лицензия эксклюзив бўлмаган ва бошқага ўтказилмайдиган ҳисобланади.

Матбуот анжумани арафасида эълон қилинган Daryo’га берган интервьюсида Муродов GM лицензия битимларини узайтириш имконияти хусусийлаштириш стратегиясини ишлаб чиқиш доирасида кўриб чиқилаётганини маълум қилди.

«Бу ҳам ҳисобга олинмоқда. Бу хусусийлаштириш стратегиясининг йўналишларидан биридир», — деди у.

UzAuto Motors’ни хусусийлаштириш режалари бир неча йилдан бери давлат даражасида муҳокама қилинмоқда.

2022 йил апрель ойида президент UzAuto Motors акцияларининг 10 фоизигача бўлган қисмини ички фонд бозорида жойлаштиришни ва корхонанинг қолган улушини, шунингдек UzAuto Motors Powertrain’ни стратегик инвесторларга сотиш стратегиясини тайёрлашни топширган эди.

2026 йил апрель ойида президент Шавкат Мирзиёевга бир қатор йирик давлат активларини, жумладан UzAuto Motors ва унинг таркибига кирувчи корхоналар, «Навоиазот» ҳамда иссиқлик электр станцияларини хусусийлаштиришга тайёргарлик бориши ҳақида ахборот берилди.

Йиғилишда хусусийлаштириш жараёнларини ва иқтисодиётда давлат иштирокини қисқартиришни жадаллаштириш топширилди.

Эслатиб ўтамиз, 2025 йил ноябрь ойида Ўзбекистон ва АҚШ миллиардлаб долларлик битимларни, жумладан 5 млрд долларлик автокомпонентлар импорти ва Америка компанияларининг UzAuto Motors хусусийлаштирилишидаги иштирокини муҳокама қилиш бўйича келишувларни имзолаган эди.

Chevrolet автомобилларини ишлаб чиқарувчи ва сотувчи компанияни 2026 йилнинг I чорагида савдога чиқариш режалаштирилган эди.