“Уй ва машина олмоқчи эдик”. Фарғонада бир ёшдан ошган ўғлини сотмоқчи бўлган эр-хотин қамалди
“Уй ва машина олмоқчи эдик”. Фарғонада бир ёшдан ошган ўғлини сотмоқчи бўлган эр-хотин қамалди
Фарғона вилоятининг Тошлоқ туманида 1,5 ёшли ўғлини 35 минг АҚШ долларига сотишга уринган ота-онага нисбатан суд ҳукми чиқарилди.
Маълум бўлишича, эр-хотин 2012-йилда турмуш қурган бўлиб, уларнинг уч нафар вояга етмаган фарзанди бор. Сотишга уринилган кенжа ўғил 2024-йилда туғилган. Эркак 2017-йилда ишлаш учун Россияга кетган, 2022-йилда қайтиб келиб, Тошкент вилоятида устачилик билан шуғулланган, аммо оиласига етарли пул юбора олмаган.
2025-йилда аёл рўзғор учун кредит олишда ёрдам сўраб маҳалла раисига мурожаат қилган. Аёлнинг суддаги кўрсатмасига кўра, раис унга кенжа фарзандини боласи йўқ оилага беришни, бунинг эвазига эса уй таъмири ва автомобил билан таъминланишини айтган. Раис эса судда бу гапларни рад этиб, аёлни бундай фикрдан қайтарганини билдирган.
2026-йил апрел ойи бошида эркак Тошкентдан қарз бўлиб уйига қайтган. Шу кунларда аёлга нотаниш шахс қўнғироқ қилиб, 10 йилдан буён фарзанд кўрмаётган оилага 1,5 ёшли ўғлини беришни сўраган. Эркак аввал болани фарзанд кўрмаган укасига беришни таклиф қилган, кейин эса қарзлари сабаб уни пул эвазига сотишга рози бўлган.
Суҳбатлар давомида эр-хотин болани 35 минг долларга беришга келишиб, уни тилхат асосида топширишини айтган. Шундан сўнг суҳбатларни ёзиб олган харидор 11-апрел куни ҳуқуқни муҳофаза қилувчи органга мурожаат қилган.
Ўша куни шартли харидор ва эр-хотин бола билан тумандаги маҳалла биносига борган. Аёл тилхат ёзаётган, эри эса 35 минг долларни олаётган пайтда ўтказилган тезкор тадбирда улар ушланган.
Тадбир якунида аёл 35 минг долларни қандай сарфлаш бўйича ҳам келишиб олганини айтган.
“Ушбу пулнинг 25 минг долларига кўп қаватли уйлардан уй сотиб олиб яшашга, 10 минг долларига эса турмуш ўртоғим автомобил сотиб олишига келишгандик. Шароитимиз оғир бўлгани учун фарзандимизни сотишдан бошқа чора топмадик”, деган боланинг онаси.
Мазкур ҳолат суд томонидан иш бўйича тўпланган далиллардан бири сифатида баҳоланган.
Жиноят ишлари бўйича Сўх туман суди ҳукмига кўра, эркак Жиноят кодексининг 135-моддаси 3-қисми “б” банди (одам савдоси) билан айбли деб топилиб, ЖКнинг 57-моддаси қўлланган ҳолда 6 йилга озодликдан маҳрум қилинган. Аёлга ҳам шу модда асосида 5 йил муддатга озодликдан маҳрум қилиш жазоси тайинланган.
Эр-хотин жазони умумий тартибли колонияларда ўташи белгиланган. Уларнинг уч нафар вояга етмаган фарзанди қариндоши қарамоғига топширилган.