Самарқандда хотинини пичоқлаб ўлдирган эркак 17 йилга қамалди

Самарқандда хотинини пичоқлаб ўлдирган эркакка 17 йил қамоқ жазоси берилди

Самарқанд шаҳрида нонушта вақтида хотини билан тортишиб, уни пичоқлаб ўлдирган 49 ёшли эркакка ҳукм чиқарилди.

Суд ҳужжатларига кўра, 1998-йилда никоҳдан ўтган эр-хотиннинг бир нафар фарзанди бўлган. Улар турмуш қурганидан кўп ўтмай аёл ишга чиққан. Эркак эса уни доимий равишда хиёнатда гумон қила бошлаган. Хотиннинг ишга бориб-келиши, бозорга ёки ота-онасиникига қатнаши, шунингдек, яна фарзанд кўришни истамагани оилавий келишмовчиликларга сабаб бўлиб келган.

“Тўйимиздан кўп ўтмай хотиним менинг рухсатимсиз ишга чиқиб кетди. Шундан сўнг унинг феъл-атвори ўзгарди, уни хиёнатда гумон қила бошладим. Лекин бирор марта аниқ бир киши билан ушламадим”, деди судланувчи.

Эркакнинг айтишича, бу рашк ва низолар йиллар давомида давом этган. Ҳатто 2023-йил ноябрида эр-хотин АҚШга бориб яшай бошлаган пайтда ҳам жанжаллар тўхтамаган.

2026-йил 7-январ куни улар Самарқандга қайтиб, бир уйда, аммо алоҳида хоналарда яшай бошлаган. Узоқ йиллар давомида хотинини хиёнатда гумон қилиб келган эркак бирга яшашни истамаслигини айтиб, ажрашишни таклиф қилган. Бироқ аёл бунга рози бўлмаган.

Фожиа 14-феврал куни юз берган. Соат 10:00 ларда уйғониб, нонушта тайёрлаган эркак спиртли ичимлик ичиб, хотинини уйғотган ва улар дастурхонга ўтирган.

Судланувчининг кўрсатишича, нонушта пайтида хотини ундан нега ўқрайиб ўтирганини сўраган. Шундан кейин эркакнинг жаҳли чиқиб, стол устидаги пичоқни олиб, аёлнинг ўнг биқинига урган. Иккинчи зарбани беришга уринаётганида пичоқнинг учи букилиб қолган. Сўнг у даҳлизга ўтиб, иситиш печи устида турган бошқа пичоқни олиб келган.

Ошхонадан қочиб чиқаётган аёл остонага қоқилиб йиқилгач, эркак унинг орқа қисмига бир неча бор пичоқ билан зарба берган. Кейин пичоқни ташлаб, қўшни ҳовлидаги акасиникига чиққан ва қариндошларига хотинини ўлдирганини айтган. Воқеа жойига профилактика инспектори ва яқинлари етиб келган.

Марҳуманинг укаси судда опаси ва поччаси ўртасидаги муносабатлар ёмонлашганидан тўлиқ хабардор эмаслигини, опаси ҳеч қачон шикоят қилмаганини, фақат жиянидан АҚШда жанжаллашганларини эшитганини айтган.

Суд-тиббий экспертиза аёлнинг ўлимига ўткир қон кетиши сабаб бўлганини аниқлаган. Психиатрия экспертизаси эса эркак жиноят пайтида ўз ҳаракатларини тўлиқ англаганини кўрсатган.

Жиноят ишлари бўйича Нарпай туман суди ҳукми билан эркак Жиноят кодексининг 97-моддаси 2-қисми “ж” банди билан (қасддан одам ўлдириш) айбдор деб топилган. Унга 17 йил муддатга озодликдан маҳрум қилиш жазоси тайинланган.