Урганч аэропортининг янги терминали 19 йилга Корея компанияси бошқарувига ўтади
Урганч аэропортининг янги терминали 19 йилга Корея компанияси бошқарувига ўтади
Жанубий Кореянинг Incheon International Airport Corporation компанияси реконструкция якунланганидан кейин 19 йил давомида Урганч аэропортининг янги йўловчи терминалини бошқаради. Бу ҳақда Podrobno.uz мухбирига Incheon International Airport Corporation лойиҳа менежери Ю Бенг Нам маълум қилди.
Incheon International Airport Corporation компанияси 1999 йилда ташкил этилган. Компания Инчхон аэропортини қуриш, бошқариш ва ундан фойдаланиш билан шуғулланади, шунингдек, консалтинг лойиҳаларини амалга оширади ва хорижий аэропортларни бошқаришда иштирок этади.
Incheon халқаро лойиҳаларни амалга оширишни 2009 йилда Ироқдаги Эрбил аэропортини операцион қўллаб-қувватлашдан бошлаган. Ўшандан бери компания 18 та давлатда 39 та лойиҳани қўлга киритди. Ўзбекистонда у илгари Тошкент аэропорти билан боғлиқ лойиҳаларда иштирок этган, 2025 йилда эса Урганч аэропортини ривожлантириш ва бошқариш лойиҳаси бўйича афзал кўрилган иштирокчи сифатида танланган.
«Биз учун бошқарувнинг моҳияти — бу сервисдир. 25 йил давомида биз сервис соҳасида ўз ноу-хауларимизни тўпладик», — деди у.
Унинг сўзларига кўра, Корея томони йўловчилар учун аэропорт тартиб-таомилларидан ўтишни янада қулай ва тезроқ қилиш мақсадида ушбу тажрибани Урганчга мослаштириш ниятида. Шу билан бирга, икки аэропортнинг кўлами сезиларли даражада фарқ қилади, шунинг учун Инчхон технологияларини шунчаки тўлиқ Урганчга кўчириб бўлмайди — улар маҳаллий шароитларга мослаштирилади.
Incheon ваколатлари биринчи навбатда янги терминал ва у билан боғлиқ ёрдамчи инфратузилмага тааллуқли бўлади. Самолётларни кутиб олиш ва жўнатиш, шунингдек, уларга техник хизмат кўрсатиш Ўзбекистон томонида қолади.
17 август куни президент Шавкат Мирзиёевга Урганч аэропортини реконструкция қилиш лойиҳаси тақдим этилди. Модернизациядан сўнг ҳаво бандаргоҳи кенг фюзеляжли Boeing 747 ва Airbus A350 самолётларини қабул қила олади.