Урганч аэропорти йилига 3,5 миллион йўловчини қабул қила олади

Урганч аэропорти йилига 3,5 миллион йўловчига хизмат кўрсата олади

Модернизациядан сўнг Урганч халқаро аэропортининг лойиҳавий ўтказувчанлик қобилиятини деярли уч бараварга — йилига 1,2 миллиондан 3,5 миллион йўловчигача ошириш режалаштирилмоқда.

Бу ҳақда Podrobno.uz мухбири иштирок этган ҳаво бандаргоҳига уюштирилган пресс-тур якунларига кўра маълум бўлди.

Урганч аэропорти директори Ойбек Маткаримовнинг маълум қилишича, асосий объектлардан бири майдони қарийб 39 минг квадрат метр бўлган янги йўловчи терминали бўлади. Унинг ўтказувчанлик қобилияти соатига 1,3 минг йўловчини ташкил этади.

Терминалда халқаро ва ички йўналишлардаги йўловчилар оқими ажратилади, замонавий рўйхатдан ўтиш, кўрикдан ўтказиш ва багажни қайта ишлаш тизимлари ўрнатилади, шунингдек, VIP ва CIP заллари, Duty Free ва умумий овқатланиш шохобчалари жиҳозланади. Лойиҳанинг умумий қиймати 242 миллион долларни ташкил этади: шундан 134 миллион доллари хусусий шерик, 108 миллион доллари эса давлат ҳиссасига тўғри келади.

Шунингдек, Хоразмга ҳафталик авиарейслар сони 16 тадан 102 тага кўпайгани хабар қилинган. Расмийлар транспорт инфратузилмасининг ривожланишини, жумладан, ҳудудга сайёҳлар оқимининг ўсиши билан боғламоқда.