Украинага тунги ҳужум: бир киши ҳалок бўлди, ярадорлар бор
Россия армияси 27-августга ўтар кечаси Киев, Запорижжя, Кривий Рих ва Харкив шаҳарлари, шунингдек, Суми ва Полтава вилоятларига ҳужум қилди. Маҳаллий ҳокимият маълумотларига кўра, ҳужумлар оқибатида камида бир киши ҳалок бўлган, бир неча киши жароҳатланган.
Украинага тунги ҳужумлар натижасида бир киши ҳалок бўлди, бир неча киши яраланди.
Суми вилоятининг Ромни ҳудудий жамоаси ҳужумга учради. Вилоят ҳарбий маъмурияти раҳбари Олег Григоровнинг хабар беришича, турар жой биносига берилган зарба оқибатида 66 ёшли аёл вафот этган. Дастлабки маълумотларга кўра, ҳудудга тўққизта учувчисиз учиш аппарати (УУА) билан ҳужум қилинган. Уларнинг бир қисми уриб туширилган бўлса-да, фуқаролик инфратузилмаси обьектларига зарбалар қайд этилган. Ҳужумдан сўнг тўрт киши тиббий ёрдам сўраб мурожаат қилган.
Запорижжя шаҳрида ҳам ҳужум натижасида жабрланганлар бор. Вилоят ҳарбий маъмурияти раҳбари Иван Федоровнинг маълум қилишича, икки эркак ва бир аёл жароҳатланган. Зарба натижасида автомобил ва бир нечта бино шикастланган, шунингдек, ёнғин келиб чиққан.
Кривий Рихда эса ракета зарбаси саноат корхонасига зарар етказган. Шаҳар мери Александр Вилкулнинг сўзларига кўра, икки киши жароҳатланган, уларнинг аҳволи оғир эмас.
Тун давомида Украина пойтахти Киев ҳам ҳужумга учраган. Киев шаҳар ҳарбий маъмурияти маълумотларига кўра, ҳаво ҳужуми оқибатидаги парчалар икки жойга – Подолский туманидаги турар жой биноси ҳовлисига ва Шевченко туманидаги таълим муассасаси ҳудудига тушган. Бундан аввал Киевда баллистик ракета ва дронлар хавфи сабаб ҳаво тревогаси эълон қилинган эди.
Харкивда эса дрон турар жой биносининг тўртинчи қаватидаги балконга келиб урилган. Харкив вилояти ҳарбий маъмурияти раҳбари Олег Синегубовнинг маълум қилишича, ҳодиса оқибатида 30 ёшли эркакда кучли стресс реаксияси кузатилган.
Полтава вилояти ҳарбий маъмурияти раҳбари Виталий Дякивнич ҳам ҳудудга ҳужум қилинганини маълум қилган, бироқ зарбаларнинг хусусияти ва уларнинг оқибатлари ҳақида қўшимча маълумот бермаган.
Маҳаллий ҳокимиятлар ҳужумлар оқибатларини аниқлаш ва зарар кўрган обьектларда тегишли хизматлар ишини давом эттираётганини билдирган.