Украина Патриот ракеталари танқислигини маълум қилди
Германия Украинага Патриот ҳаво мудофаа тизимлари учун қўшимча ПАС-2 ракеталарини шошилинч равишда етказиб беради. Британия эса ракеталарни тутиб қолиш воситаларини харид қилиш учун 100 млн фунт стерлинг ажратади. Берлин ва Лондон бошқа иттифоқчиларни ҳам қиш арафасида Украина ҳаво мудофаасини кучайтиришга чақирди.
Украина Патриот ракеталари етишмаётганини билдирди
Украина мудофааси бўйича Контакт гуруҳи — «Рамштайн» форматидаги 36-йиғилишда Германия ва Буюк Британия Киевга янги ҳарбий ёрдам пакетларини эълон қилди. 8-сентабр куни видеоконференсия тарзида ўтган йиғилишда қарийб 50 давлат вакиллари қатнашди.
Германия мудофаа вазири Борис Писториус Берлин Бундесвер омборларидан Украинага Патриот ҳаво мудофаа тизимлари учун ПАС-2 тутиб қолувчи ракеталарини зудлик билан юборишини маълум қилди.
Писториус Контакт гуруҳидаги бошқа давлатларни ҳам ўз ҳарбий захираларини қайта кўриб чиқиб, Украинага шундай ракеталарни етказишга чақирди.
Унинг айтишича, Европа давлатлари бир томондан ўз хавфсизлик эҳтиёжларини таъминлаши, иккинчи томондан эса Украинага шошилинч ёрдам бериши керак. Бу икки вазифа ўртасида мувозанатни сақлаш осон эмаслигини тан олган Германия мудофаа вазири шубҳа туғилган ҳолатларда Украина фойдасига қарор қилишга чақирди.
Писториус Украина ҳаво мудофаасини кучайтиришни ҳозирги энг долзарб эҳтиёж деб атади. Унинг фикрича, қиш яқинлашгани сари Россиянинг ҳаво ҳужумлари кучайиши мумкин. Шу боис Украина қишга тайёргарлик кўришда вақт билан пойгада экани таъкидланди.
Германия ПАС-2 ракеталаридан ташқари, Бундесвер захираларидан АИМ-9 «ҳаво-ҳаво» ракеталарини етказиб бериш ҳажмини ҳам оширади. Берлин ИРИС-Т ҳаво мудофаа тизимлари ва улар учун ракеталарни етказиб беришни ҳам давом эттиради.
Украина яна бир неча минг бошқарилувчи ИРИС-Т ракеталарини буюртма қилишни режалаштирмоқда. Бу харидларни Украинага ёрдам учун ажратилган Европа Иттифоқи кредити ҳисобидан молиялаштириш кўзда тутилган.
Бундан ташқари, Германия Украинага дронлар етказиб беришни давом эттиради ҳамда бир неча ўн минг узоқ масофали артиллерия снарядларини харид қилишни молиялаштиради. Ушбу ўқ-дорилар Британия бощилигидаги артиллерия ва ҳаво мудофааси консорсиуми орқали олиниши режалаштирилган.
Буюк Британия мудофаа вазири Уес Стриттинг йиғилишда ПУРЛ дастури доирасида ракеталарни тутиб қолиш воситаларини тезкор етказиб бериш учун 100 млн фунт стерлинг ажратилишини билдирди.
Лондон, шунингдек, жорий йил давомида Украинага 120 мингта дрон етказиб бериш бўйича мажбуриятини бажаришда давом этмоқда. Британия томони маълумотига кўра, уларнинг 25 мингдан ортиғи аллақачон Украинага берилган, қолган дронлар қиш бошлангунига қадар етказиб берилиши керак.