Уганда Шаҳзода Гаррининг Invictus Games (Енгилмас ўйинлар) мусобақасидан чиқмоқда, дейди ҳарбий қўмондон
Мудофаа бошлиғи томонидан эълон қилинган ушбу қарор Уганда иштирок этишини маълум қилганидан атиги икки ой ўтиб қабул қилинди.
Уганда Шаҳзода Гаррининг Invictus Games ўйинларидан чиқмоқда, дейди ҳарбий қўмондон
Шаҳзода Гарри июль ойида Уганда Invictus Games ўйинларига қўшилганини айтган эди
Уганда ярадор ҳарбий фахрийлар учун Сассекс герцоги томонидан ташкил этиладиган Invictus Games спорт мусобақасида иштирок этишини эълон қилганидан атиги икки ой ўтиб, унда қатнашишдан бош тортмоқда.
Африка давлати президентининг ўғли ва мудофаа кучлари қўмондони генерал Муҳоози Кайнеругаба бу ҳақдаги қарорни X ижтимоий тармоғидаги постида маълум қилди.
Унинг сўзларига кўра, мусобақадан чиқиш қарори "Унинг Олий Ҳазрати Қирол Карл III га қарши чиқиш сифатида талқин қилинмаслиги учун" қабул қилинган.
Уганда ҳукумати матбуот котиби буни BBC'га тасдиқлади: "Генерал Кайнеругаба UPDF [Уганда халқ мудофаа кучлари] Invictus Games ўйинларида иштирок этиш-этмаслигини ўзи ҳал қилади. Сиз кўрган нарса — унинг баён қилган позицияси. Агар у ўзгарса, у бу ҳақда дунёга маълум қилади".
Уганда ҳарбий қўмондонининг ушбу баёноти шу ҳафта қирол номидан юборилган ва ҳозирда Буюк Британияга қайтган шаҳзода Гарри ва Меган қироллик оиласининг расмий вазифаларини бажарувчи аъзолари эмаслигини аниқ кўрсатиб берган хатдан кейин янгради.
The Times нашрининг хабарида генералнинг "Гарри ва Меган бемаънилиги" ҳақидаги хавотирлари келтирилган бўлиб, бу қарорга айнан шу нарса сабаб бўлганига ишора қилинган.
"Биз чуқур ҳурмат қиладиган Буюк Британия Қироли Унинг Олий Ҳазрати Карл III га қарши чиқиш сифатида талқин қилинмаслиги учун Уганда Invictus Games ўйинларидан чиқади", — деб ёзди генерал тунда эълон қилган постида.
"Биз Унинг Олий Ҳазратининг розилиги бўлмаган ҳеч қандай тадбирда иштирок этмаймиз".
Бироқ, қироллик оиласига яқин манбаларнинг таъкидлашича, Қирол ярадор ҳарбий хизматчиларга ёрдам берадиган барча лойиҳаларни қўллаб-қувватлайди.
Invictus Games вакили мусобақадан чиқиш тўғрисида ҳеч қандай расмий билдиришнома олмаганини ва Угандадаги алоқадор шахслардан вазиятга ойдинлик киритишни сўраётганини маълум қилди.
Генерал Кайнеругабанинг пайшанба кунги бошқа X постлари орасида шундай сўзлар ҳам бор эди: "Мен ўзимни дунёдаги энг келишган, энг жасур ва улуғвор Қўмондон деб ҳисоблайман".
У, шунингдек, унинг рухсатисиз рақсга тушган бошқа генераллар ҳақида бир қатор ғазабли хабарларни ҳам жойлаштирган.
Уганданинг келгуси йилда Бирмингемда бўлиб ўтадиган навбатдаги ўйинларда иштирок этиши июль ойида, шаҳзода Гарри Лондонда ярадор ҳарбий хизматчиларнинг иродаси ва реабилитациясига бағишланган ушбу спорт тадбирини тарғиб қилаётган пайтда эълон қилинган эди.
Уганда ушбу ўйинларда иштирок этувчи 26-давлатга айланган эди.