Туркия Саудия Арабистонига ҳарбий ёрдам кўрсатишга тайёрлигини билдирди
Туркия Саудия Арабистонига ҳарбий ёрдам беришга тайёр эканини маълум қилди
Туркия ташқи ишлар вазири Ҳоқон Фидан ҳусийлар ҳужумлари туфайли Саудия Арабистонида ҳарбий эҳтиёжлар пайдо бўлиши мумкинлигини ва Анқара уларни қондиришга тайёрлигини айтди.
“Биз Саудия Арабистонининг ҳудудий яхлитлиги ва суверенитетига жуда жиддий ҳужумлар бўлаётганини кўряпмиз. Бизнинг пактимизда иттифоқчилик келишуви мавжуд. Биз бу масалада бирдаммиз...Уларнинг маълум ҳарбий эҳтиёжлари бўлиши мумкин, айниқса, баъзи техник масалалар бўйича. Уларни қондириш биз учун қийинчилик туғдирмайди”, деди Фидан.
Вазирнинг сўзларига кўра, гап Туркия, Саудия Арабистони ва Покистон август ойида имзолаган Макка қўшма мудофаа битими доирасидаги иттифоқчилик мажбуриятларини бажариш ҳақида кетмоқда. Ҳужжатга кўра, уч давлатдан бирига қуролли ҳужум уюштирилиши уларнинг барчасига қилинган ҳужум сифатида баҳоланади. Бироқ шартномада ҳарбий жавоб беришнинг аниқ механизмлари батафсил кўрсатилмаган.
Шу билан бирга, Фидан Саудия Арабистонини АҚШ ва Эрон ўртасидаги урушга тортиб бўлмаслигини таъкидлади. У Ар Риёд бу можаронинг иштирокчиси бўлишни истамаслигини, Туркия эса томонларга жанговар ҳаракатларни тўхтатиш бўйича янги таклифлар етказганини айтди.
“Ташаббуслар жуда кўп, лекин томонлар уларни қабул қилиши керак. Янги таклифлар бор, умид қиламанки, уларни қабул қилишади. Акс ҳолда, инқирозга маълум вақтгача чидаш мумкин, аммо иқтисодий оқибатлар аллақачон чегарадан чиқишни бошлади”, деди Туркия ташқи ишлар вазири.
Томонлар ўртасидаги зиддият Саудия Арабистони июл ойида Эрон самолётининг Сана аеропортига қўнишига тўсқинлик қилгач, кучайди. Бортда Эроннинг собиқ олий раҳнамоси Оятуллоҳ Али Хоманаийнинг дафн маросимидан қайтаётган юқори мартабали ҳусий амалдорлар бўлган.
Шундан сўнг ҳусийлар Қизил денгизда Саудия Арабистони танкерларига ҳужум қилиб, қиролликнинг нефт экспортида муҳим бўлган йўналишга таҳдид солди. Ўтган ҳафта улар Қизил денгиздаги порт шаҳри ҳамда Саудия Арабистонининг нефт экспорти учун муҳим бўлган ва Ҳормуз бўғозига муқобил денгиз йўли сифатида кўриладиган Боб ал-Мандаб бўғози яқинидаги оролларни эгаллаб олди.
Реутерс манбаларига кўра, Саудия Арабистони Хитойга мурожаат қилиб, ҳусийларга таъсир ўтказишда ёрдам сўраган. Шундан сўнг Пекин ҳусийларни тийиб туриш учун Эронга босим ўтказган. Эрон томони бу мурожаатга жавобан минтақадаги барқарорлик ва тинчлик АҚШ ҳамда Исроилнинг Эронга қарши урушини тўхтатишга боғлиқ эканини билдирган. Макка шартномаси аъзоси бўлган Покистон мажбуриятларини бажаришга тайёрлигини билдирган.