Тунги клублар йўқолиб бормоқда - бу эса ёшларга ўз таъсирини кўрсатмоқда
Бир ёш йигит ўз шаҳрида түнки ҳаёт бўлмагани сабабли "эркин нафас ола олмаслиги ва кўнгил оча олмаслигини" айтди.
Тунги клублар йўқолмоқда - бу эса ёшлар ҳаётига ўз таъсирини кўрсатмоқда
30 ёшгача бўлган бир киши BBC’га тинчроқ жойда яшашни афзал кўришини айтди
30 ёшгача бўлган одамлар ўзи яшайдиган жойларда тунги ҳаёт "ғарибона" ва чеклангани сабабли "эркин нафас олиш ва мароқли вақт ўтказиш" имкониятини бой беришаётганини айтишди.
Ҳенри Гэнноннинг айтишича, у Уокинг шаҳрида ўсиб-улғаяётган пайтда ёшлар учрашиши ва мулоқот қилиши мумкин бўлган жойларнинг "йўқ бўлиб боришига" гувоҳ бўлган.
"Жамоат жойлари шунчаки ғойиб бўлгандек туюлади", дея қўшимча қилди у.
Бир вақтлар Уокингда бир нечта тунги масканлар бўлган, аммо ҳозирда шаҳар марказида бирорта ҳам анъанавий ихтисослашган тунги клуб қолмаган.
Гэнноннинг таъкидлашича, бунга яшаш қиймати инқирози сабабчи бўлиб, у 20 ёшдан ошган одамларнинг кўчага чиқиши ва ҳордиқ чиқаришига "молиявий имкон бермаяпти".
"Одатда қўшимча даромади кўп бўлмаган ёшлар учун қилишга арзигулик ҳеч нарса йўқ", деди у.
23 ёшли йигитнинг айтишича, бошқа танловлар "Wetherspoons (паблар тармоғи), паркда ўтириш ёки бошқа шаҳардан ҳаддан ташқари қиммат таксида қайтиш"дан иборат.
"Мен ўз ёшимга хос бўлган жуда муҳим нарсани — эркин бўлиш, мароқли вақт ўтказиш ва ҳаётдан завқ олиш имкониятини бой бераётганимни ҳис қиляпман.
Байрам кайфияти йўқ, ҳамма нарса бироз ғарибона."
Tунги саноат уюшмаси (NTIA) 2025 йилда Буюк Британия шаҳарларининг чорак қисми ўзларининг барча тунги клубларини йўқотганини маълум қилди.
Шунингдек, ҳар олтита шаҳардан бирида ҳозирда умуман тунги масканлар йўқлиги айтилди.
"Бу рақамлар Британия тунги ҳаёт инфратузилмасининг тизимли равишда емирилаётганидан жиддий огоҳлантиришдир", деди NTIA бош ижрочи директори Майкл Килл.
"Биз миллий маданий инқирозга дуч келмоқдамиз.
Биз кўриб турганимиздек, етказилган зарарни ортга қайтариб бўлмайди. Бу масканлар бир марта ғойиб бўлса, камдан-кам ҳолларда қайта тикланади."
Адамнинг айтишича, Тонбриждаги тунги ҳаёт манзараси — бу ерда охирги клуб бир неча йил олдин ёпилган — "анча чекланган".
"Баъзи яхши паблар ва кичик барлар бор, лекин аксарият жойлар ярим кечаси атрофида ёпилади", деди у.
Асли аҚШдан бўлган 29 ёшли йигит Кент шаҳри уни "тинчроқ ва сокинроқ" бўлгани учун жалб қилганини айтди.
Шундай бўлса-да, Адамнинг сўзларига кўра, тунги ҳаётнинг йўқлиги ёшларни ҳордиқ чиқариш учун бошқа жойларга боришга мажбур қилмоқда, бу эса маҳаллий иқтисодиётга зарар етказмоқда.
"Бу, шубҳасиз, қўлдан бой берилган имкониятдир", дея қўшимча қилди у.
Адам тунги клублар одамлар билан танишиш жойи бўлиши мумкинлигини айтиш билан бирга, ёшлар кўчага чиққанда камроқ спиртли ичимликлар ичиш тенденциясини ҳам қайд этди — бу уларнинг соғлиғи учун фойдалироқдир.
Спорт залида вақт ўтказаётган йигирма ёшлилар
BBC аввалроқ 30 ёшгача бўлган, ичимлик маданиятидан узоқлашиб, спорт залида "ижтимоий эҳтиёжларини қондираётган" ёшлар ҳақида хабар берган эди.
Уларнинг айтишича, спиртли ичимликларсиз мулоқот қилиш уларга куч бағишлайди, эрталабки бош оғриғидан халос қилади ва ўхшаш қизиқишларга эга одамлар билан танишиш имконини беради.
Бошқалар ҳам маданий ўзгаришларни таъкидлаб, кўпроқ одамлар клублардан кўра ичкиликсиз ижтимоий тадбирларни танлашаётганини айтишди.
Ғарбий Сассексдаги Чичестерлик Финн Эшкрофтнинг айтишича, Ковиддан бери "одамларга кўчага чиқиш ва мулоқот қилиш қийинлашган".
Бироқ, у 30 ёшгача бўлган кўплаб ёшлар клубларсиз ҳам "эплаб кун кечираётганини" ва бунинг ўрнига ўз тадбирларини ташкил қилаётганини таъкидлаш муҳимлигини айтди.
Эшкрофт одамларни ўзлари яшайдиган жойда тунги ҳаёт кўпроқ бўлишини хоҳлашса, бу ҳақда очиқ гапиришга чақирди.
Чичестернинг анъанавий тунги клублари ёпилган бўлса-да, Эшкрофтнинг айтишича, шаҳарда ҳали ҳам мусиқа ва рақс учун ишлатилиши мумкин бўлган жойлар кўп.
У BBC’га ушбу жойларда "маҳаллий даражада мусиқани ривожлантириш" учун C-Side Sounds ва Strictly Grooves тадбир компанияларига асос солганини айтди.
"Талабалар борадиган жой топиш учун жуда интилишган эди", деди у.
"Биз, шубҳасиз, шаҳардаги тунги ҳаётни ривожлантиришга ёрдам бердик."
22 ёшли йигитнинг айтишича, ўзлари яшайдиган жойда тунги ҳаёт кўпроқ бўлишини хоҳлайдиган одамлар учун "энг муҳим нарса" — "бу ҳақда очиқ гапиришдир".
"Улар маҳаллий кенгашлар ва бошқарув органларини одамлар биргаликда хотиралар қолдириши учун... жойлар бўлишини таъминлашга [ундаш] кучига эга."