Трамп сулҳни эълон қилганидан кейин Харкив энергетикасига зарба берилди - Зеленский
Украина президенти Володимир Зеленский Россия қўшинлари Харкивдаги ИЕМ-5 иссиқлик электр марказига Доналд Трамп «энергетик сулҳ» ҳақида баёнот берганидан кейин зарба берганини билдирди. Маҳаллий ҳокимият шу куни кечқурун Харкив атрофидаги ракета ҳужумида уч киши ҳалок бўлгани ва 22 киши жароҳатланганини маълум қилди.
Трамп сулҳни эълон қилганидан сўнг Харкив энергетикасига зарба берилди — Зеленский
ДВ хабарига кўра, Зеленский 11-октабр куни кечқурун Телеграмъда Харкивдаги энергетика инфратузилмаси нишонга олинганини билдирган.
«Ҳозиргина Харкив шаҳридаги ИЕМ-5га, Харкив энергетикасига зарба берилди», — деган Украина президенти.
Тахминан бир соат ўтгач, у Харкив вилоятидаги энергетика обьектларига ҳужум АҚШ президенти энергетикага зарбаларни тўхтатиш ҳақида эълон қилганидан кейин содир бўлганини алоҳида қайд этган.
Харкив вилояти ҳарбий маъмурияти раҳбари Олег Синегубов эса 11-октабр кечқурун шаҳар атрофига берилган ракета зарбасида уч киши ҳалок бўлгани ва яна 22 киши жароҳат олганини маълум қилган.
Унинг айтишича, иккита кўп қаватли уй, битта хусусий уй, озиқ-овқат дўкони биноси ва бешта автомобил зарар кўрган. Бироқ Синегубов бу хабарда ИЕМга ҳужум ҳақида тилга олмаган. Шу сабабли қурбонлар ва яраланганларнинг айнан электр марказига берилган зарба билан боғлиқлиги хабарда аниқлаштирилмаган.
Маҳаллий «Харков Инфо» Телеграм-канали ҳам ИЕМга кечки ҳужум ҳақида ёзиб, ёнғин акс этган видеони жойлаган. Канал муаллифларига кўра, тасвирлар маҳаллий аҳоли томонидан 11-октабр куни олинган.
Ўша куни Доналд Трамп Россия ва Украина «энергетик сулҳ»га келишиб олганини билдирган эди.
«Шу пайтдан бошлаб Россия ва Украина ўртасидаги урушда энергетик сулҳ жорий этилади. Ҳар икки томон бунга розилик берди. Уни бузманг!» — деб ёзган АҚШ президенти Трутҳ Сосиалъда.
Зеленский аввалига Ахиос журналистига бундай қисман сулҳга эришилганидан хабари йўқлигини айтган. Аммо Россия ҳам рози бўлса, ташаббусни қўллаб-қувватлашини билдирган.
Кейинроқ Украина президенти Киев Америка томонидан тафсилотларни кутаётганини маълум қилган. У Украина Қуролли кучлари барча буйруқларни олганини, энди АҚШнинг Россия билан мулоқотига оид аниқ маълумотлар ва Путиннинг Трамп айтган шартларни бажариши кутилаётганини таъкидлаган.