Трамп Беларусдан калий сотиб олишини айтди, Лукашенко буни имконсиз деб атади
Трамп Беларусдан калий сотиб олишини айтди, Лукашенко буни имконсиз деб атади
АҚШ Беларусдан калийли ўғитлар харид қилиш бўйича йирик битим устида ишламоқда. Бу ҳақда президент Доналд Трамп ўзининг Трутҳ Сосиал ижтимоий тармоғида хабар берди.
Нарх Канадага тўлаётганимиздан анча паст бўлади. Бу фермерларимиз ва ранчо эгалари учун жуда яхши янгилик, деди Трамп.
Бироқ Беларус президенти Александр Лукашенко ушбу хабардан бир неча соат олдин Ғарб бозорларига калийли ўғитлар етказиб бериш тўлиқ тикланса ҳам, буни амалга ошира олмаслигини айтган эди. У барча хомашё ҳажми аллақачон шартнома асосида банд қилинганини таъкидлади.
Мендаги маълумотларга кўра… биз Шарққа юзлана олдик. Америкаликлар билан олиб борилаётган музокаралар бунинг тасдиғидир. Бу ерда кўпчилик “Эҳҳ, калий!” деб бонг урмоқда. Биз ҳатто Ғарб бозорларига маҳсулот етказиб беришни истаган тақдиримизда ҳам, бундай ҳажмга эга эмасмиз, ҳаммаси шартнома қилиб бўлинган, деди Лукашенко.
АҚШ калийли ўғитларни деярли тўлиқ импорт қилади. Ушбу импортнинг қарийб 80 фоизи Канада, яна 12 фоизи Россия ҳиссасига тўғри келади. Беларус эса дунёдаги энг йирик калийли ўғит ишлаб чиқарувчилардан бири бўлиб, Канада, Россия ва Хитой қаторида туради.
Шу билан бирга, санксиялар сабаб унинг Ғарб бозорларига калий етказиб бериш имконияти чекланган. Бу санксиялар 2020-йилда Беларусдаги норозилик намойишларининг шафқациз бостирилиши ва Александр Лукашенконинг Россиянинг Украинага қарши урушидаги “иштироки” туфайли жорий этилган.
Доналд Трамп иккинчи муддатга қайта сайланганидан кейин АҚШ Лукашенко билан муносабатларни йўлга қўйишни бошлади. Жумладан, Беларус калий саноатига нисбатан санксиялар бекор қилинди. 16-сентябр куни АҚШ президентининг махсус вакили Жон Коулнинг Минскка навбатдаги ташрифидан сўнг 25 нафар сиёсий маҳбус озод этилди. Шундан кейин АҚШ “Лакокраска” ОАЖ ва “Беллесбумпром” консернига нисбатан санксияларни бекор қилди. Шу билан бирга, Европа Иттифоқи Беларус калийи импортига қўйилган чекловларни сақлаб қолмоқда.