Трамп АҚШ стратегик захираларини Венесуела нефти ҳисобидан тўлдирмоқчи

Трамп АҚШ стратегик захираларини Венесуела нефти ҳисобидан тўлдириш ниятида

АҚШ президенти Доналд Трампнинг маълум қилишича, яқинда тузилган келишувга биноан Венесуеладан олинадиган нефт мамлакатнинг стратегик захираларини тўлдиришга йўналтирилади.

Оқ уй раҳбари бу ҳақда ўзининг ижтимоий тармоқдаги саҳифасида ёзиб қолдирди. Унинг сўзларига кўра, захираларни қайта тўлдириш жараёни тез орада бошланади. Доналд Трамп Венесуела нефтини "АҚШ халқига Венесуеладан совға" деб атади.

Ҳозирча келишувнинг тафсилотлари ва унинг ҳар икки томонга қандай иқтисодий фойда келтириши номаълум. Оқ уйнинг таъкидлашича, бу ҳаракатдан кўзланган асосий мақсад оғир аҳволга тушиб қолган Венесуела нефт саноатини қайта тиклашдир. Ушбу мақсадга эришиш учун катта миқдордаги инвестициялар талаб қилинади, шу сабабли жараён узоқ давом этиши мумкин.

Жорий йилнинг 21-август ҳолатига кўра, Қўшма Штатларнинг стратегик нефт захиралари қарийб 290 миллион баррелни ташкил этган. Бу сўнгги 44 йилдаги энг паст кўрсаткичлардан бири ҳисобланади. Бунга АҚШ глобал бозордаги беқарорлик туфайли резервуарлардан катта миқдорда нефт чиқаргани сабаб бўлган.

Стратегик захиралар ҳам Жо Байден, ҳам Доналд Трамп маъмуриятлари даврида қисқаришда давом этган. Россиянинг Украинага босқини ва Эрон билан боғлиқ можаро каби омиллар бунга сабаб бўлган.