Тошкентдан Андижонга янги электропоезд йўлга қўйилади. Йўловчилар учун нималар ўзгаради
Тошкентдан Андижонга янги электропоезд қатнай бошлайди. Йўловчилар учун нималар ўзгаради
Тошкент — Андижон йўналишида янги CRRC-Dalian электропоезди ишга туширилади. Унинг биринчи рейси 21 октябрдаёқ амалга оширилади, бироқ душанба кунлари ҳаракат бекор қилинади. Бундан ташқари, бир нечта маҳаллий йўналишлар бўйича жадвалга ҳам тузатишлар киритилади.
"Ўзтемирйўлйўловчи" АЖ хабар беришича, замонавий электропоезд "Тошкент — Андижон — Тошкент" йўналишидаги аввалги таркиб ўрнини эгаллайди. Поездда бешта эконом-класс вагони мавжуд бўлиб, у 415 нафар йўловчига мўлжалланган.
732-сонли поезд Тошкентдан соат 18:40 да жўнаб кетади ва Андижонга соат 23:12 да етиб боради.
Кайтиш йўналишидаги 731-сонли поезд 22 октябрдан қатнай бошлайди: Андижондан жўнаш — соат 07:20 да, Тошкентга етиб келиш — соат 12:12 да.
Шу билан бирга, 26 октябрдан бошлаб 730/729-сонли "Тошкент — Андижон — Тошкент" поезди душанба кунлари қатнашни тўхтатади. Ушбу куни янги таркиб ҳафталик техник кўрикка юборилади.
Бундан ташқари, 21 октябрдан Андижондан Хива, Урганч, Термиз ва Қўнғиротга, шунингдек, бир нечта маҳаллий поездлар жадвали ўзгаради. 22 октябрдан 27 октябргача бўлган ўзгаришлар Андижон ва Тошкент ўртасидаги бошқа рейсларга ҳам таъсир қилади.
"Ўзтемирйўлйўловчи" йўловчилардан жўнаш вақтини олдиндан аниқлаштиришни ва сафарларни режалаштиришда ўзгаришларни ҳисобга олишни сўрайди.