Тошкентдаги автомобил йўлида ер ўпирилди
Тошкентнинг Яккасарой туманидаги Глинка кўчасида 3-сентабр куни асфалт йўл ўпирилди. Бир киши жароҳат олди.
Тошкентдаги автомобил йўлида ер ўпирилди
Тошкент шаҳри ҳокимлиги ҳодиса оқибатида бир киши енгил жароҳат олганини маълум қилди.
Иссиқлик таъминоти корхонаси — Веолиа Энергй ҳодиса жойига авария-тиклаш бригадаси ва мутахассислари етиб борганини, ҳодиса тафсилотлари ҳамда ўпирилиш сабаблари ўрганилаётганини билдирди. Компанияга кўра, ҳеч қандай сизиб чиқиш ҳолати аниқланмаган.
«Ҳудудгаз Пойтахт» газ таъминоти филиали мазкур ҳудуддан юқори босимли газ қувури ўтмагани ва содир бўлган ҳодиса табиий газ тармоқлари билан боғлиқ эмаслигини, ўрганишлар давомида газ сизиб чиқиши билан боғлиқ ҳолатлар аниқланмаганини маълум қилди.
«Тошкент шаҳар сув таъминоти» АЖ авария ичимлик суви тармоқларига тегишли эмаслигини, у иссиқ сув тармоғида юзага келганини билдирди.
Глинка кўчасининг Шота Руставели кўчасига олиб чиқувчи қисмида транспорт воситалари ҳаракати вақтинча тўхтатилди.