Тошкентдаги 7-уйни бузишга бўлган ҳар қандай уринишнинг олди олинади — Маданий мерос агентлиги

Тошкентдаги Бобур кўчасида жойлашган 7-уйга нисбатан ҳар қандай ноқонуний бузиш, вайрон қилиш ёки ўзгартиришга уринишларнинг олди олинади, дея маълум қилди Маданий мерос агентлиги директорининг биринчи ўринбосари Элмурод Нажимов.

Бу баёнот Жемчуг Ҳоусе компанияси аризасига кўра, уйда яшовчилардан бирини кўчириш бўйича 4-сентабрга белгиланган суд мажлиси ҳақидаги хабар тарқалганидан сўнг берилди.

Агентлик раҳбарининг биринчи ўринбосари таъкидлашича, "Агентликнинг позицияси аниқ: мазкур бинонинг маданий мерос обьекти сифатидаги мақоми сақланиб қолади. У давлат муҳофазасида… Биз мамлакатимизнинг тарихий меросини асраб-авайлашимиз ва уни келажак авлодларга етказишимиз шарт".

Идоранинг қайд этишича, бинони Моддий маданий мероснинг кўчмас мулк обьектлари миллий рўйхатидан (у ерда 332−1-рақам остида қайд этилган) чиқариш бўйича илгари ҳам таклифлар "кўриб чиқилган ва рад этилган".

"Ушбу масала юзасидан 2026-йил 5-август куни келиб тушган сўнгги мурожаат ҳам агентлик томонидан кўриб чиқилди. Агентлик 2026-йил 19-августдаги хати билан мазкур обьектни Маданий мерос обектларининг миллий рўйхатидан чиқаришнинг қонунчиликда назарда тутилган асослари мавжуд эмаслигини ҳамда бундай ҳаракатнинг ноқонуний эканини расман маълум қилди. Обьектнинг қонунчиликда белгиланган мақоми сақланиб қолади ва у давлат муҳофазасида бўлади", — дея таъкидлади агентлик.

7-уй атрофидаги баҳслар кўп йиллардан буён давом этмоқда ва бу вақт давомида Газета воқеалар ривожини ёритиб келди.

1936-йилда қурилган бино Тошкентнинг собиқ ҳокими Абдуқаҳҳор Тўхтаев томонидан 2007-йил август ойида миллий рўйхатдан чиқарилган эди (ўшанда жами 303 та бино рўйхатдан чиқарилган). 2018-йил октабр ойида пойтахтнинг ўша пайтдаги ҳокими Жаҳонгир Ортиқхўжаев 7-уй остидаги ер майдонини аҳолини кўчириш ва уларга компенсация тўлаш шарти билан янги турар жой биносини қуриш учун Универсал Паскинг Мастерс компаниясига топширган. Кейинчалик қурилиш ҳуқуқи Жемчуг Ҳоусе компаниясига ўтказилган. Яшовчиларнинг аксарияти кўчирилган, аммо аҳолининг бир қисми уйга муҳофаза қилинадиган обьект мақомини қайтаришни талаб қилиб келган.

2021-йил бошида Тошкент туманлараро маъмурий суди Абдуқаҳҳор Тўхтаевнинг қарорини ҳақиқий эмас деб топди. Кўп ўтмай, Вазирлар Маҳкамаси уйни яна миллий рўйхатга киритди.