Тошкентда велосипед ва скутерлар учун алоҳида йўлаклар кўпайиши мумкин
Пойтахтнинг Лутфий кўчасида микромобиллик воситалари учун алоҳида ҳаракатланиш йўлаги синов тариқасида ташкил этилди
Тошкентда велосипед ва скутерлар учун алоҳида йўлаклар сони ортиши эҳтимоли бор
Тошкент шаҳрида микромобиллик воситалари учун алоҳида ҳаракатланиш йўлаги синов тариқасида йўлга қўйилди. Ушбу лойиҳа Лутфий кўчасининг 2,4 километрлик қисмида амалга оширилди.
Мазкур йўлак велосипед, электросамокат, электроскутер ва бошқа микромобиллик воситаларининг ҳаракати учун мўлжалланган.
Мутахассислар таъкидлашича, микромобиллик воситалари учун алоҳида инфратузилма бўлмаган тақдирда улар йўлнинг қатнов қисмида автомобиллар, тротуарларда эса пиёдалар билан бир маконда ҳаракатланишга мажбур бўлади. Бу эса турли ҳаракат иштирокчилари ўртасида ноқулайлик ва хавф туғдириши мумкин.
Лутфий кўчасидаги пилот лойиҳа микромобиллик воситалари учун алоҳида инфратузилма яратиш имкониятларини амалда баҳолашга имкон берди. Дастлабки натижаларга кўра, йўлак фойдаланувчилар учун қулай ва тушунарли экани қайд этилган.
Келгуси лойиҳаларда бундай йўлакларнинг хавфсизлигини оширишга ҳам алоҳида эътибор қаратилади. Йўл шароитидан келиб чиқиб, микромобиллик йўлакларини автомобиллар ҳаракатидан делиниаторлар, ажратувчи ва бошқа ҳимоя элементлари ёрдамида жисмонан ажратиш режалаштирилмоқда.
Йўл ҳаракатини ташкил этиш маркази мутахассислари пилот лойиҳа натижаларидан келиб чиқиб, пойтахтнинг шундай ечимни қўллаш мумкин бўлган бошқа кўча ва ҳудудларини ҳам ўрганмоқда.
Таъкидланишича, Лутфий кўчасидаги тажриба Тошкентда микромобиллик инфратузилмасини босқичма-босқич ривожлантириш учун асос бўлиб хизмат қилиши мумкин.