Тошкентда School Bus йўлга қўйиш имкониятлари ўрганилмоқда
Тошкентда мактаб автобуслари тизимига бўлган талаб ўрганилмоқда: сўровнома пойтахтдаги 29 та мактабда 58 369 нафар ўқувчини қамраб олди.
Тошкентда School Bus тизимини йўлга қўйиш имкониятлари кўриб чиқилмоқда
Тошкентда School Bus мактаб автобуслари тизимини жорий этиш вариантларини амалий ўрганишга киришилди. Ушбу ташаббус ўқувчиларнинг пойтахт мактабларига қатнашини хавфсизроқ ва қулайроқ қилишга қаратилган. Бу ҳақда Тошкент шаҳар Транспорт тизимини бошқариш маркази хабар бермоқда.
Биринчи босқичда мутахассислар ота-оналарнинг эҳтиёжларини таҳлил қилмоқда, ўқувчилар ҳозирда ўқув муассасаларига қандай усулда етиб бораётганини аниқламоқда ва кейинчалик автобус йўналишларини шакллантириш учун маълумотлар тўпламоқда.
Ҳозирги вақтда сўровнома Тошкентдаги 328 та мактабдан 29 тасида ўтказилди. Биринчи навбатда унга ўқувчилар сони энг кўп бўлган ва махсус мактаб ташувларига талаб юқори бўлиши кутилаётган ўқув муассасалари киритилди. Тадқиқотда 58 369 нафар ўқувчининг оила аъзолари ёки васийлари иштирок этди.
Дастлабки маълумотларга кўра, ўқувчиларнинг 38,5 фоизи мактабга пиёда боради. Яна 33,1 фоизини ота-оналари шахсий автомобилларида олиб келишади. Ўқувчиларнинг 18,3 фоизи автобуслардан, 5,7 фоизи таксидан, 3,5 фоизи метродан фойдаланади. Яна 0,9 фоизи микромобиллик воситаларидан фойдаланади.
Шу билан бирга, сўровнома иштирокчиларининг 73,5 фоизи мактаблар учун махсус автобус ташувлари ташкил этилишини хоҳлашини билдирган. Тошкент шаҳар ТТБМ олинган натижалар School Bus тизимига сезиларли даражада потенциал талаб мавжудлигидан далолат беришини таъкидламоқда.
Сўровномани босқичма-босқич пойтахтнинг қолган мактабларида ҳам давом эттириш режалаштирилган. Тадқиқот якунлангач, мутахассислар ўқувчиларнинг йўловчи оқимини таҳлил қилишни, талаб юқори бўлган йўналишларни, зарур автобуслар сонини ва уларнинг ҳаракат жадвалларини белгилашни мақсад қилган.
Бундан ташқари, болаларни чиқариш ва тушириш учун хавфсиз жойларни ташкил этиш масалалари ва бўлажак тизимнинг бошқа ташкилий жиҳатлари ўрганилади.
Таҳлил якунларига кўра, School Bus тизимини ишга туширишнинг амалий имкониятлари баҳоланади. Сўнгра тегишли ташкилотлар билан биргаликда Тошкентда тизимни босқичма-босқич жорий этиш масаласини кўриб чиқиш режалаштирилмоқда.
Ота-оналар @school_coddbot Telegram-боти орқали сўровномада иштирок этишга чақирилди. Олинган жавоблар мактаб автобусларининг потенциал фойдаланувчилари сонини, зарур транспорт воситалари ва йўналишлар миқдорини аниқлашга ёрдам бериши керак.