Тошкентда пойтахт солиқ бошқармасининг собиқ раҳбари ва Бош прокуратура ҳузуридаги Департамент бошқармаси бошлиғининг собиқ ўринбосари суд қилинмоқда

Тошкентда пойтахт солиқ бошқармасининг собиқ раҳбари ва Бош прокуратура ҳузуридаги Департамент бошқармаси бошлиғининг собиқ ўринбосари устидан суд кетмоқда

Жиноят ишлари бўйича Шайхонтоҳур туман судида Тошкент шаҳар солиқ бошқармасининг собиқ бошлиғи Юнусжон Насимжонов ва Бош прокуратура ҳузуридаги Департаментнинг шаҳар бошқармаси бошлиғи собиқ ўринбосари Алишер Ғаниевга нисбатан жиноят иши кўриб чиқилмоқда. Насимжонов ўзлаштириш ва ваколатларини суиистеъмол қилишда, Ғаниев эса ваколатларини суиистеъмол қилиш ва чегарани ноқонуний кесиб ўтишда айбланмоқда.

Насимжонов 167-модда («Ўзлаштириш ёки растрата йўли билан талон-торож қилиш») ва 205-модда («Ҳокимият ёки мансаб ваколатини суиистеъмол қилиш») бўйича айбланмоқда. У пойтахт солиқ хизматини 2021 йилдан 2026 йилгача бошқарган.

Ғаниевга 205-модда («Ҳокимият ёки мансаб ваколатини суиистеъмол қилиш») ва 223-модда («Қонунга хилоф равишда чет элга чиқиш ёки Ўзбекистон Республикасига кириш») қўйилган.

Ҳар икки мулозим 27 январ куни Шавкат Мирзиёев раислигида ўтган йиғилишдан сўнг лавозимидан озод этилган эди. Ўшанда Насимжоновнинг фаолиятини ўрганиш ва қонун доирасида чора кўриш топширилганди. Ғаниевга нисбатан эса йиғилишда у «тадбиркорлар» деб аталувчиларга солиқ тўлашдан бўйин товлашда кўмаклашгани айтилганди. Йиғилишда умуман пойтахт ҳуқуқ-тартибот ва солиқ органлари фаолияти танқид қилинган эди.