Тошкентда менежер ноқонуний ишга жойлаштириш учун қўлга олинди
Чилонзор туманида туристик фирма менежери фуқарони Словакияга ишга жойлаштириш эвазига 3 минг доллар ва 2,5 млн сўм талаб қилди.
Тошкентда ноқонуний ишга жойлаштириш билан шуғулланган менежер қўлга олинди
Тошкент шаҳрининг Чилонзор туманида Ўзбекистон фуқаросини Словакияга ноқонуний ишга юборишда гумонланган сайёҳлик фирмаси менежери қўлга олинди. Бу ҳақда Ўзбекистон Давлат хавфсизлик хизмати хабар берди.
Тезкор тадбир ДХХ Тошкент шаҳри бўйича бошқармаси ходимлари томонидан Иқтисодий жиноятларга қарши курашиш департаменти билан ҳамкорликда ўтказилди.
ДХХ маълумотларига кўра, қўлга олинган шахс фуқароларни хорижда ишга жойлаштириш ҳуқуқига эга бўлмаган маҳаллий сайёҳлик компаниясида менежер бўлиб ишлаган. Эркак пул маблағларининг бир қисмини олаётган вақтида ашёвий далиллар билан ушланган.
Аниқланишича, менежер Самарқанд вилоятида яшовчи фуқародан Словакияда ишга жойлаштириш ва виза расмийлаштириб бериш эвазига 3 минг доллар ва 2,5 млн сўм талаб қилган.
Ҳуқуқ-тартибот идоралари ходимлари уни 1 минг доллар ва 2,5 млн сўмни олаётган вақтида қўлга олишган.
Қўлга олинган шахсга нисбатан жиноят иши қўзғатилган. Тергов ҳаракатлари олиб борилмоқда.
ДХХ фуқароларни бу каби қонунбузарликлар ҳақида 1520 қисқа рақами орқали хабар беришга чақирди. Идора мурожаатчиларнинг шахси сир сақланишини кафолатлашини таъкидлади.