Тошкентда сайёҳлик агентлиги ходими Словакияга ишчи визаларини сотган

Тошкентнинг Чилонзор туманида тегишли ваколатга эга бўлмай туриб, Самарқанд вилоятида яшовчи фуқарога ишчи визасини расмийлаштириб бериш ва уни Словакияга ишга юборишни ваъда қилган туристик фирма менежери қўлга олинди. Эркак ўз хизматлари эвазига 3 минг доллар ва 2,5 миллион сўм талаб қилган.

Давлат хавфсизлик хизмати хабарига кўра, менежер Ўзбекистон фуқароларини хорижга ишга юборишда воситачилик қилиш ҳуқуқига эга бўлмаган.

Келишилган сумманинг бир қисми — 1 минг доллар ва 2,5 миллион сўмни олаётган вақтида у ашёвий далиллар билан қўлга олинди.

Эркакка нисбатан жиноят иши қўзғатилиб, тергов ҳаракатлари олиб борилмоқда.

Бундан ташқари, Тошкентда уч нафар чет эл фуқаросига деярли 30 минг доллар эвазига Ўзбекистонга кириш визаларини ноқонуний расмийлаштириб беришда гумонланган икки аёл қўлга олинди. Улардан бири жами суммани олаётган вақтида, иккинчиси эса унга 27 минг доллар топширилганидан кейин ушланди; иккаласига нисбатан жиноят иши қўзғатилган.