Тошкентда ичимлик суви тарифи оширилиши мумкин
Тошкентда ичимлик суви тарифи оширилиши мумкин
Тошкентда ичимлик суви тарифини бир кубометр учун 3 100 сўмгача ошириш таклиф қилинди. Ушбу масала халқ депутатлари шаҳар Кенгаши кўриб чиқиши учун киритилди. Бу ҳақда 30 октябрь куни ўтказилган матбуот анжуманида "Ўзсувтаъминот" АЖ вакиллари маълум қилди.
Тадбирда таклиф этилаётган ошириш сабаблари очиқланмади.
Тарифлар охирги марта 2023 йилда қайта кўриб чиқилган эди. Октябрь ойида "Тошкент шаҳар сув таъминоти" АЖ аҳоли учун ичимлик суви нархини бир кубометр учун 400 сўмдан 1 400 сўмгача оширишни таклиф қилган эди. Ташаббус сув таъминоти ташкилоти харажатларининг ошгани билан изоҳланган. 24 ноябрь куни шаҳар Кенгаши янги нархларни тасдиқлади ва улар 2023 йил 9 декабрдан кучга кирди.
2024 йил 1 апрелдан бошлаб истеъмолчиларнинг алоҳида категориялари учун ҚЎШИМЧА қиймат солиғини (ҚҚС) ҳисобга олган ҳолда тариф бир кубометр учун 1 568 сўмни ташкил этди. Хусусан, ушбу ставка хусусий сектор ва марказлаштирилган иссиқ сув таъминотига эга бўлмаган янги қурилган уйлар аҳолиси учун амал қилмоқда.
Шу билан бирга, Тошкент вилоятида аҳоли учун тариф аллақачон бир кубометр учун 3 100 сўмга етган. Маҳаллий ҳокимият органлари аввалроқ харажатларнинг ошишини электр энергияси нархи, солиқлар, хорижий кредитларга хизмат кўрсатиш, меҳнатга ҳақ тўлаш, сув қувурлари тизимларини таъмирлаш ва модернизация қилиш харажатларининг ортгани билан изоҳлаган эди.
Тарифларни қайта кўриб чиқиш тартиби "Ичимлик суви таъминоти ва оқова сувларни чиқариб юбориш тўғрисида"ги қонун билан тартибга солинади. Амалдаги процедурага кўра, сув таъминоти ташкилотларининг таклифлари ваколатли органлар томонидан кўриб чиқилади, якуний қарорни эса халқ депутатлари шаҳар Кенгаши қабул қилади.
2027 йил 1 январдан эътиборан ичимлик суви ва канализация тарифларини тасдиқлаш ваколатларини Вазирлар Маҳкамаси ҳузуридаги Идоралараро тариф комиссиясига ўтказиш режалаштирилмоқда.