Тошкент ва Бухорода кучли таъсир қилувчи дори воситалари савдоси билан шуғулланувчилар қўлга олинди
Тошкент ва Бухорода кучли таъсир қилувчи дори воситалари савдоси билан шуғулланувчилар қўлга олинди
Тошкент шаҳри ва Бухоро вилоятида божхона органлари кучли таъсир қилувчи дори воситаларининг ноқонуний айланмасига чек қўйди. Бир ҳолатда турар жой ертўласидан прегабалин моддаси бўлган мингдан ортиқ таблетка топилган бўлса, бошқа бир ҳолатда эркак киши габапентин моддаси бўлган дориларни сотишга уринган вақтида қўлга олинди.
Тошкент шаҳри Юнусобод туманида яшовчи 47 ёшли фуқаронинг хонадонида ўтказилган тезкор тадбир Божхона қўмитасининг Контрабандага қарши курашиш бошқармаси ходимлари томонидан ДХХ билан ҳамкорликда амалга оширилди.
Ертўла кўздан кечирилганда, ҳуқуқ-тартибот идоралари ходимлари 84 қути «Регапен» препаратини — қарийб 1,2 минг дона таблеткани аниқладилар. Дори воситалари олиб қўйилди.
Марказий божхона лабораторияси экспертизаси препарат таркибида 352,5 грамм кучли таъсир қилувчи прегабалин моддаси борлигини тасдиқлади. Амалдаги қоидаларга кўра, ушбу модданинг 10 граммдан ортиғи йирик миқдор ҳисобланади ва жиноий жавобгарликка сабаб бўлади.
Яна бир ҳолат Бухоро вилоятининг Ғиждувон туманида юз берди. Вилоят божхона бошқармаси тезкор таркибий тузилмалари ходимлари 204 дона «Габатен» таблеткасини 1,6 минг долларга сотишга уринган эркакни қўлга олди. Препарат таркибида ҳам кучли таъсир қилувчи модда — габапентин борлиги аниқланди.
Ҳар икки ҳолат бўйича жиноят иши қўзғатилди. Тергов ҳаракатлари олиб борилмоқда.
Бундан аввал Сирдарёда Spark йўловчисидан ярим минг дона прегабалин капсуласи топилган эди.