Тошкент ва атрофдаги туманлар иссиқхоналари 1 декабргача энергия тежамкор иситиш тизимига ўтиши керак

Тошкент ва атрофдаги туманларнинг иссиқхона хўжаликлари 1 декабргача энергия тежамкор иситиш тизимига ўтиши керак

Тошкент шаҳри ва пойтахт вилоятининг бешта туманидаги иссиқхона хўжаликлари 2026 йил 1 декабргача иситиш тизимларини ўзгартиришлари шарт. Бундай талаб Вазирлар Маҳкамасининг 586-сонли қарори билан белгиланган. Янги чора-тадбирлар ҳаво сифатини яхшилаш ва аҳоли саломатлигини муҳофаза қилишга қаратилган.

Экологик режим Тошкент шаҳри, Юқоричирчиқ, Қибрай, Янгийўл, Зангиота ва Тошкент туманларига татбиқ этилади.

Иссиқхоналарга табиий ва суюқлантирилган газ, электр энергияси, геотермал ва қуёш энергиясидан фойдаланишга рухсат берилади. шунингдек, иссиқлик электр станцияларининг иккиламчи иссиқлигидан фойдаланишга ҳам йўл қўйилади. Бунинг учун хўжаликлар давлат экологик экспертизасининг ижобий хулосасини олишлари керак.

Кўмир, брикет ва пеллеталардан фойдаланадиган иссиқхона эгалари 2026 йил 1 декабргача рухсат этилган энергия турларига ўтишлари керак.

Шу билан бирга, қарорда қаттиқ ёқилғида ишлашни давом эттираётган хўжаликлар учун ҳам талаблар белгиланган. Улар ёқилғи узатиш ва ёнишни автоматик бошқариш тизимини, шунингдек, чиқариндиларни тозалаш ускуналарини ўрнатишлари зарур.

Бундан ташқари, иссиқхоналар чиқариндиларни узлуксиз ўлчаб боришлари ва маълумотларни Экология қўмитасига узатишлари шарт. Хўжаликларга мувофиқлик сертификатлари, онлайн камералар ва захира генераторлари ҳам талаб қилинади. Улар узлуксиз электр таъминоти ва чиқиндиларни утилизация қилишни таъминлашлари керак.