Тошкентдаги иссиқхоналар чиқиндилари реал вақт режимида кузатиб борилади
Тошкентдаги иссиқхоналар чиқиндилари реал вақт режимида кузатиб борилади
Тошкент ва унга ёндош бешта тумандаги иссиқхона хўжаликлари экологик тоза энергия манбаларига ўтиши керак. Қаттиқ ёқилғидан фойдаланадиган корхоналар учун ўтиш муддатини 2026 йил 1 декабргача белгилаш таклиф этилди. 15 октябрдан 15 мартгача иссиқхоналар чиқиндилари реал вақт режимида назорат қилинади, қоидабузарликлар учун эса уларнинг фаолиятини тўхтатиб қўйиш имконияти кўзда тутилган.
Ушбу чора-тадбирлар президент Шавкат Мирзиёев томонидан иссиқхоначилик соҳасига "яшил" технологияларни жорий этиш ва хўжаликларнинг экологик хавфсизлигини таъминлашга бағишланган тақдимотда кўриб чиқилди.
Ўтган йили махсус комиссия Тошкент ва унга ёндош ҳудудлардаги иссиқхоналарни хатловдан ўтказди ва хўжаликларнинг бир қисмига экологик тоза энергия манбаларига ўтишга ёрдам берди. Бироқ, баъзи корхоналарда ҳали ҳам кўмирдан фойдаланилмоқда.
Куз-қиш даврида шамолнинг сусайиши ва ҳарорат инверсияси туфайли иссиқхоналардан чиқадиган чиқиндилар пойтахт ва унинг атрофида тўпланиб қолиши мумкин. Шу муносабат билан Тошкент шаҳри ва унга ёндош бешта туманда "яшил" технологиялардан фойдаланишга асосланган махсус экологик режимни жорий этиш таклиф қилинди.
Иситиш учун табиий газ, электр энергияси, геотермал ва қуёш энергияси, шунингдек, иссиқлик электр станцияларининг иккиламчи иссиқлигидан фойдаланишга рухсат берилади. Шиналар, пластмасса, битум, мазут, ишлатилган мойлар ва чиқиндиларни ёқиш тақиқланади.
Қаттиқ ёқилғидан фойдаланадиган хўжаликлар 1 декабргача рухсат берилган энергия манбаларига ўтишлари керак бўлади.
Истисно фақат қатъий техник талабларга жавоб берадиган корхоналар учун қилиниши мумкин. Улар ёқилғини ёпиқ хоналарда сақлаши, автоматлаштирилган қозонларни, самарали чанг-газ тозалаш ускуналарини ва захира генераторини ўрнатиши, кул ва шлакнинг хавфсиз йиғилишини таъминлаши, шунингдек, мўри баландлиги нормативларига риоя қилиши керак.
2026 йил 15 октябрдан 2027 йил 15 мартгача иссиқхона хўжаликларида доимий экологик мониторинг ўтказиш режалаштирилмоқда. Тозалаш ускуналарининг ишлаши, атмосферага чиқарилаётган чиқиндилар ҳажми ва фойдаланилаётган ёқилғига қўйиладиган талабларга риоя қилиниши назорат қилинади.
Ўлчов аспоблари ва видеокузатув маълумотлари реал вақт режимида Миллий экология қўмитасининг ахборот тизимига келиб тушади. Мониторингга дронлар ва жамоатчилик вакиллари ҳам жалб этилади.
Чанг-газ тозалаш ускуналари мавжуд бўлмаганда, белгиланган чиқинди нормаларидан ортиб кетганда ёки тақиқланган ёқилғидан фойдаланилганда хўжаликларга нисбатан таъсир чоралари қўлланилади. Зарурат туғилганда уларнинг фаолияти тўхтатиб қўйилиши мумкин.
Тақдимотда иссиқхона хўжаликларида ҳосил бўладиган ифлосланган дренаж ва фильтрация сувлари масаласига ҳам тўхталиб ўтилди. Уларни йиғиш, тозалаш ва қайта фойдаланиш учун Оҳангарон туманида ихтисослаштирилган оператор ва зарур инфратузилмани яратиш таклиф этилди.
Масъул шахсларга иссиқхона хўжаликларининг жойлашуви, энергия ресурсларини етказиб бериш манбалари ва ҳажмлари кўрсатилган рақамли харитасини тайёрлаш топширилди.