Тошкент мактабларида давомат камералар орқали назорат қилинади
Тошкентда Face ID технологиялари орқали мактабларда давоматни назорат қилиш тизими — SI Davomat («ИИ-давомат») жорий этилмоқда. У Сергели туманидаги 26 та мактабда синовдан ўтказилмоқда. Тажриба натижаларига кўра, тизимни бошқа умумтаълим мактабларида ҳам жорий этиш режалаштирилган.
Тошкент мактабларида давомат камералар орқали кузатилади
Тошкентда ўқувчилар давоматини назорат қилишнинг SI Davomat («СИ-давомат») тизимини жорий этиш бошланди. У смарт-камералар ва Face ID технологияси ёрдамида ўқувчиларнинг дарслардаги иштирокини аниқлайди.
Ҳозирги вақтда тизим Сергели туманидаги 26 та мактабда синовдан ўтказилмоқда. У ерда 446 та смарт-камера ўрнатилган. Эксперимент якунларига кўра, тизимни пойтахтнинг бошқа умумтаълим мактабларида ҳам босқичма-босқич жорий этиш режалаштирилган.
Пайшанба куни Тошкент шаҳар ҳокимлигининг Вазиятлар марказида тизимнинг ишлаш тамойиллари муҳокама қилинди, унда шаҳар ҳокими Шавкат Умурзоқов иштирок этди, деб хабар берди ҳокимлик матбуот хизмати.
Агар ўқувчи дарсларни узрли сабабсиз қолдирса, унинг ота-онасига SMS-билдиришнома юборилади. Бу ҳақдаги маълумотлар мактаб директори, профилактика инспектори, Миллий гвардия ходими ва маҳалла вакилларига ҳам автоматик тарзда узатилади, дейилади хабарда.
SI Davomat тизими Соғлиқни сақлаш вазирлигининг ERP Maktab ва DMED тизимлари билан интеграция қилинган. Хабар қилинишича, бу касаллик туфайли дарсга келмаган ўқувчиларни ва дарсларни узрли сабабсиз қолдирганларни фарқлаш имконини беради.
Тизим маълумотлари асосида мактабларни давомат кўрсаткичларига қараб «яшил», «сариқ» ва «қизил» тоифаларга ажратиш режалаштирилмоқда.
Ўтган йилнинг август ойида Тошкент ҳокими пойтахт мактабларида сунъий интеллект ёрдамида таълим сифати, давомат ва ўқувчиларнинг руҳий ҳолатини мониторинг қилиш дастурини жорий этиш тўғрисидаги қарорни имзолаган эди.
Ўқувчиларнинг таълим муассасаси ҳудудида бўлиш вақтини Face ID ёрдамида қайд этувчи тизимни жорий этиш режалари ҳақида ҳали 2021 йилнинг баҳорида хабар берилган эди.