Тошкент иссиқхоналарига имтиёзли шартларда Сурхондарёга кўчиб ўтиш таклиф этилади
Тошкент иссиқхоналарига имтиёзли шартларда Сурхондарёга кўчиб ўтиш таклиф этилади
Тошкент ва Тошкент вилоятидаги иссиқхона хўжаликларини Сурхондарё вилоятидаги «Сурхон-Агро» эркин иқтисодий зонасига кўчириш режалаштирилмоқда. Ўз хўжаликларини у ерга кўчиришга қарор қилган тадбиркорларга аукционларда ер участкаларининг бошланғич нархини норматив қийматининг 1 фоизигача камайтириш таклиф этилди.
Бундан ташқари, уларга солиқ имтиёзлари бериш ва олиб кирилаётган ускуналарни божхона божларидан озод қилиш имконияти кўриб чиқилмоқда.
Иссиқхоналарни қулай иқлим шароитига эга ҳудудларга кўчириш масаласини президент Шавкат Мирзиёев иссиқхоначилик соҳасига «яшил» технологияларни жорий этишга бағишланган тақдимотда кўриб чиқди. Сурхондарё вилоятининг Шеробод туманида жойлашган «Сурхон-Агро» зонаси учун аллақачон 940 гектар ер ажратилди ва мастер-план тайёрланди.
Таклифга кўра, аукционларда ер участкаларининг бошланғич нархи норматив қийматнинг 10 фоизини ташкил этади. Қиймати 10 миллион доллардан ортиқ бўлган лойиҳалар, шунингдек, Тошкент ва Тошкент вилоятидан иссиқхоналарни кўчираётган тадбиркорлар учун ушбу кўрсаткични 1 фоизгача камайтириш таклиф қилинди.
Зона иштирокчилари учун ер ижара тўловининг ноль ставкаси беш йил муддатга белгиланди, шунингдек, канализация ва ер ости сувларидан фойдаланганлик учун тўловлар бўйича уч йиллик имтиёзлар назарда тутилган. Бундан ташқари, уларни беш йил муддатга ер ва мол-мулк солиқларидан, шунингдек, фойда солиғидан озод қилиш таклиф этилди. Импорт қилинадиган иссиқхона ускуналари учун ҳам божхона божларини бекор қилиш таклиф қилинди.
400 гектар майдонда инвесторларга тайёр лойиҳалар шаклида таклиф этиладиган иссиқхоналар ва агрологистика объектларини жойлаштириш режалаштирилмоқда. Зона инфратузилмасини ривожлантиришга 220 миллиард сўм, лойиҳаларни молиялаштиришга яна 200 миллиард сўм йўналтирилиши кўзда тутилган. 2027 йилда зонага 100 миллион доллар инвестиция жалб этиш режалаштирилмоқда.
Шунингдек, Тошкент ва унга туташ бешта тумандаги иссиқхона хўжаликлари экологик тоза энергия манбаларига ўтиши кераклиги хабар қилинмоқда. Қаттиқ ёқилғидан фойдаланадиган корхоналар учун ўтиш муддатини 2026 йил 1 декабргача белгилаш таклиф этилди. 15 октябрдан 15 мартгача иссиқхоналарнинг чиқариндилари реал вақт режимида кузатиб борилади, қоидабузарликлар учун эса уларнинг фаолиятини тўхтатиб қўйиш имконияти назарда тутилган.