Тошкент давлат техника университетининг юзлаб талабалари кечаси кўчага ҳайдалди
Пойтахтдаги бир нечта олийгоҳ, хусусан техника университетига вилоятдан келиб ўқиётган 300 нафар талаба ётоқхона учун пул тўлаган бўлса-да, бир кун ичида бинодан чиқариб юборилган. Бу талаб ҳуқуқ идоралари ва университет маъмурияти томонидан қўйилган. Вазирлик изоҳига кўра, давлат-хусусий шериклик асосида қурилган ТТЖнинг ҳали кадастр ҳужжати йўқ ва ундан фойдаланиш учун зарур рухсатлар олинмаган.
Тошкент давлат техника университетининг юзлаб талабалари тунда кўчага чиқариб юборилди
Улар университет ҳудудида давлат-хусусий шериклик асосида қурилган талабалар ётоқхонасида яшаб келишган ва бунинг учун тўлов ҳам қилишган. Бироқ 5-октабр куни талабаларга ётоқхонани бўшатиш топширилган, 6-октабр кечқурун эса 300 нафар талаба бинодан чиқариб юборилган. Кўчага ҳайдалганлар орасида қизлар ҳам бор.
“Биз вилоятдан келиб ўқиймиз. Ётоқхона учун пулни олдиндан тўлаганмиз. Лекин кеча бизга ётоқхонани бир кун ичида бўшатиш ҳақида айтилди. 6-октабрда эса ҳамма талабани чиқариб юборишди. Бу ётоқхона давлат-хусусий шериклик асосида ташкил этилгани, лекин ҳали лицензия олмагани айтилди. Ётоқхона учун пулни тўлаган бўлсак, энди қаерга боришимизни сўраганимизда, “бизга тепадан буйруқ берилган”, дейишди.
Кеч соатда биздан тахминан 300 нафар талабани чиқариб юборишди. Университет проректори, прокуратура ходими ва участка инспектори келиб, ётоқхонани бўшатишимиз кераклигини айтди. Биз “бориб турадиган жойимиз йўқ, кўчада қоламизми?” деб сўрадик. Аммо аниқ ечим таклиф қилинмади. Пули борлар хостелга, таниши борлар танишиникига кетди. Орамизда қизлар бор, улар қаерга боради тунда?
Биз пул тўлаганмиз. Агар ётоқхонанинг лицензияси бўлмаган бўлса, бу масала нега талабалар жойлаштирилиб, улардан пул олингандан кейин аниқланяпти? Энди биз қаерда яшаймиз, тўлаган пулимиз нима бўлади?
Бу масалани Олий таълим вазирлиги орқали ҳал қилишга ҳаракат қилдик. Аммо улар бу масалани ҳал қила олмаслигини, лицензия бўлмаса, буни ички ишлар органлари ҳал қилишини айтди. Биз эса ҳозир қаерга боришимизни билмаймиз”, – дейди талабалар.
Вазирлик қуйидагича изоҳ берди:
“Тошкент шаҳри Талабалар шаҳарчасида Тошкент давлат техника университети билан давлат-хусусий шериклик асосида қурилган талабалар турар жойи ҳозирча расман фойдаланишга топширилмаган.
Мазкур обьектнинг кадастр ҳужжатлари ҳали расмийлаштирилмаган ҳамда ундан фойдаланиш учун зарур тегишли рухсатлар олинмаган. Шу сабабли обьектга талабаларни расмий тартибда жойлаштириш имкони мавжуд эмас.
Амалдаги тартибга кўра, талабалар турар жойига жойлашиш учун талаба Давлат хизматлари марказлари ёки my.gov.уз портали орқали ариза топширади ҳамда белгиланган тартибда йўлланма олганидан сўнг турар жойга жойлаштирилади.
Бироқ тадбиркор томонидан мазкур обьектда айрим талабалар белгиланган тартибга риоя этилмаган ҳолда, тегишли йўлланмасиз жойлаштирилгани аниқланди. Шунингдек, Тошкент давлат техника университетига тегишли бўлмаган бошқа олий таълим ташкилотлари талабаларининг ҳам ушбу обьектга жойлаштирилган ҳолатлари кузатилган.