“Титаник” бутунлай бошқача бўлиши мумкин эди: бир оғиз гапи туфайли Меттю Макконаҳи Жек ролига тасдиқланмаган

"Титаник" филми бутунлай бошқача кўринишга эга бўлиши мумкин эди: Меттю Макконахи биргина гапи туфайли Жек ролидан маҳрум бўлган.

Ишониш қийин, аммо кино тарихидаги энг машҳур филмлардан бири – "Титаник"да бошқа актёр ўйнаши мумкин эди. Севги қурбони Жек Доусон образи Леонардо Дикаприога эмас, балки мутлақо бошқача услуб ва овозга эга бўлган бошқа актёрга насиб этган бўларди.

Жеймс Кемероннинг 1997-йилда экранларга чиққан филми дарҳол шоҳ асарга айланди. У Дикаприони жаҳон юлдузига айлантирди ва дунёга Жек ҳамда Роузнинг машҳур жуфтлигини тақдим этди. Филм бир вақтнинг ўзида 11 та "Оскар" мукофотини ва рекорд даражадаги касса даромадларини қўлга киритди.

Аммо бош ролга актёр танлаш қарори осон бўлмаганини кўпчилик билмайди. Бир пайтлар филм ижодкорлари Меттю Макконахи номзодини жиддий кўриб чиқишган.

Бу ҳақда кўп йиллар давомида Кемерон билан ҳамкорлик қилган продюсер Жон Ландау ўз хотираларида шундай ёзади:

"Биз уни Кейт (Уинслет) билан бўлган саҳнани суратга олишга таклиф қилдик. Меттю чўзиқ (техасча) талаффуз билан ролини ижро этди. Жим (Кемерон): "Жуда соз, энди бошқача қилиб кўрайлик", деди. Меттю эса: "Йўқ, жуда яхши чиқди, раҳмат", деб жавоб берди. Айтиш мумкинки, Макконахи учун шу билан ҳаммаси тугади."

Биргина сўз ва қайсарлик сабаб рол бошқага ўтиб кетади. Бугунги кунда "Титаник"да ёш Дикаприодан бошқа ҳеч кимни тасаввур қилиб бўлмайди. Унинг Жеки романтика, эркинлик ва фожиали муҳаббат тимсолига айланди. Аммо воқеалар бутунлай бошқача кечиши ҳам мумкин эди.