Термиз қум ва чанг бўронларига қарши курашишга тайёрланмоқда
Тошкентда Термиз шаҳрининг қум ва чанг бўронлари ҳамда улар билан боғлиқ ҳаво ифлосланишига чидамлилигини оширишга бағишланган маслаҳат учрашуви бўлиб ўтди. Тадбир БМТнинг Атроф-муҳит бўйича дастури (UNEP) ва Экология ва иқлим ўзгариши миллий қўмитаси томонидан ташкил этилди. Учрашув Термиз жамоатчилиги ва соғлиқни сақлаш тизимининг қум ва чанг бўронларига чидамлилигини мустаҳкамлаш лойиҳаси доирасида ўтказилди ва […]
Термиз қум ва чанг бўронларига қарши курашишга тайёрланмоқда
Тошкентда Термиз шаҳрининг қум ва чанг бўронларига ҳамда улар билан боғлиқ ҳаво ифлосланишига чидамлилигини оширишга бағишланган маслаҳатлашув учрашуви бўлиб ўтди. Тадбир БМТнинг Атроф-муҳит бўйича дастури (UNEP) ва Экология ва иқлим ўзгариши миллий қўмитаси томонидан ташкил этилди.
Учрашув табиатга асосланган ечимлардан фойдаланган ҳолда Термиз жамоалари ва соғлиқни сақлаш тизимининг қум ва чанг бўронларига ҳамда ҳаво ифлосланишига чидамлилигини мустаҳкамлаш лойиҳаси доирасида бўлиб ўтди. Лойиҳа Япониянинг молиявий кўмагида 2026 йил апрелдан 2027 йил мартгача амалга оширилади.
Мутахассислар қум ва чанг бўронлари PM10 ва PM2.5 майда дисперсли заррачалари концентрациясини кескин оширишга қодирлигини таъкидладилар. Термиздаги ҳаво сифатига иситиш мавсуми, транспорт, қишлоқ хўжалиги ва кичик саноат корхоналари ҳам таъсир кўрсатади.
Лойиҳа доирасида сунъий йўлдош ва ер усти маълумотларини бирлаштириш, ифлосланиш манбалари ва мавсумийлигини ўрганиш, шунингдек, миллий мутахассислар учун амалий тренинглар ўтказиш режалаштирилган. Шу асосда хавф чегаралари ва «светофор» тамойили бўйича хабардор қилиш тизимига эга бўлган эрта огоҳлантириш тизимининг прототипи яратилади.
Бундан ташқари, зарур харажатлар ҳисоб-китоби билан қум ва чанг бўронларини мониторинг қилиш бўйича миллий режа тайёрланади. Ҳужжатда ер усти, баландлик ва сунъий йўлдош кузатувларига, маълумотлар сифатига ва масъул ташкилотларнинг ҳамкорлигига қўйиладиган талаблар белгиланади.
Алоҳида эътибор табиатга асосланган чора-тадбирларга — экотизимларни тиклаш, кўкаламзорлаштириш, тупроқни барқарорлаштириш ва чанглик даражасини пасайтиришга қаратилади. Шунингдек, мутахассислар Ўзбекистоннинг бошқа заиф ҳудудларида бундай чора-тадбирларни амалга ошириш учун халқаро молиялаштиришни жалб қилиш имкониятларини ўрганадилар.
Иштирокчилар халқаро ташкилотлар, давлат тузилмалари ва маҳаллий ҳокимият органлари ўртасида техник ҳамкорлик ва мувофиқлаштиришни давом эттиришга келишиб олдилар. Термизда ишлаб чиқилаётган ёндашувлардан келгусида мамлакатнинг бошқа ҳудудларида маълумотлар алмашиш ва қум ҳамда чанг бўронларини биргаликда прогноз қилиш учун фойдаланилиши мумкин.