Тошкент иссиқлик электр станциясида куз-қиш мавсумига тайёргарлик ҳолати ўрганилди

Экология ва иқлим ўзгариши миллий қўмитасининг ишчи гуруҳи Тошкент иссиқлик электр станциясида куз-қиш мавсумига тайёргарлик ҳолатини ўрганди.

Ишчи гуруҳ корхонанинг жорий куз-қиш мавсумига тайёргарлиги, асосий ускуналарнинг техник ҳолати, иситиш мавсумида станциянинг барқарор ва хавфсиз фаолият юритишини таъминлаш бўйича олиб борилаётган ишлар, шунингдек, филтрларнинг техник ҳолати, улардан самарали фойдаланиш даражаси ва техник хизмат кўрсатилишини атрофлича кўриб чиқди.

Ўрганиш жараёнида чанг-газ тозалаш тизимларини келгусида модернизация қилиш масалалари ҳам муҳокама қилинди. Ускуналарни босқичма-босқич янгилаш, замонавий технологияларни жорий этиш, тозалаш самарадорлигини ошириш ва атмосфера ҳавосига салбий таъсирни камайтиришга қаратилган чора-тадбирларни изчил амалга ошириш зарурлиги таъкидланди. Бундан ташқари, ишчи гуруҳ 9 ва 10-энергоблокларда янги филтрлаш ускуналарини қуриш жараёнини ҳам кўздан кечирди.

Шунингдек, ишчи гуруҳ корхонада экологик талабларга риоя этиш ва куз-қиш мавсумида юзага келиши мумкин бўлган экологик хавфларнинг олдини олиш бўйича кўрилаётган чораларни ҳам ўрганди.

Ўрганиш якунлари бўйича масъул мутахассисларга тегишли тавсиялар берилди. Амалдаги тозалаш тизимларининг ишончли ишлашини таъминлаш, ускуналарга ўз вақтида техник хизмат кўрсатиш ҳамда уларни келгусида модернизация қилиш бўйича ишларни давом эттиришга алоҳида эътибор қаратиш тавсия этилди.

Бундай профилактик тадбирлар саноат корхоналарининг экологик хавфсизлигини ошириш, атмосфера ҳавосига салбий таъсирни камайтириш ҳамда куз-қиш мавсуми бошланишидан олдин юзага келиши мумкин бўлган экологик хавфларнинг олдини олишга хизмат қилади.