Теренс Кроуфорд боксга қайтмоқчи. Рақиб ҳам аниқ

Теренс Кроуфорд боксчилик фаолиятига қайтишга тайёрлигини билдирди. Рақиб сифатида эса ВБО камари эгаси Жарон Эннис тилга олинди.

Уч вазн тоифасида собиқ мутлақ жаҳон чемпиони Теренс Кроуфорд катта спортга қайтиб, Жарон Эннис билан рингга чиқишга тайёр эканини маълум қилди.

“Жарон Эннис, агар фаолиятимни қайта тикласам, навбатдаги жангда мен билан тўқнаш келган бўлардингми?”, деб ёзди Кроуфорд Х (собиқ Твиттер) тармоғидаги саҳифасида.

Эннис эса бунга жавобан ўзининг жангга тайёрлигини яширмади: “Теренс Кроуфорд, 1000 фоиз!”

Эслатиб ўтамиз, Теренс Кроуфорд ўтган йилнинг охирида спортдаги фаолиятини якунлаганини билдирганди. У 2025-йил 13-сентябр куни бўлиб ўтган сўнгги жангида ҳакамлар қарори билан мексикалик Саул Алваресни мағлуб этиб, иккинчи ўрта вазн тоифасида (76,2 кг гача) мутлақ жаҳон чемпиони унвонини қўлга киритган эди. Америкалик боксчи биринчи ярим ўрта ва ярим ўрта вазнлардан кейин кетма-кет учинчи дивизионда мутлақ чемпион бўлган тарихдаги илк спортчига айланганди. Унинг ҳисобида жами 42 та ғалаба бор, шундан 31 таси нокаут билан, мағлубият эса йўқ.

Жарон Эннис эса сўнгги жангини 2026-йил июн ойида ўтказиб, Ксандер Заясни еттинчи раундда техник нокаут билан енгган. Унинг профессионал боксдаги ғалабалари 36 тани ташкил этади, у ҳам ҳали бирорта жангда мағлуб бўлмаган (32 таси нокаут).