Бокс бўйича собиқ Жаҳон чемпиони Жанубий Африкада отиб ўлдирилди

Бокс бўйича собиқ жаҳон чемпиони Золани Тете Жанубий Африкада ўз уйи олдида отиб ўлдирилди.

Жанубий Африка Республикаси спорт, санъат ва маданият вазири Гейтон Маккензининг хабар беришича, 38 ёшли боксчи ўз автомобилида ўлдирилган. У билан бир машинада бўлган 27 ёшли аёл эса кўплаб жароҳатлар билан шифохонага ётқизилган.

Полиция маълумотларига кўра, воқеа Шарқий Кейп провинсиясининг Мданцане шаҳрида содир бўлган. Тете ўз яшаш манзилига келиб, дарвоза очилишини кутиб турган вақтда юзига ниқоб таққан икки қуролли шахснинг пистирмасига дуч келган.

Золани Тете 2007—2008-йилларда ВБФ, 2017 ва 2019-йилларда эса ВБО йўналишлари бўйича Жаҳон чемпиони камарига эгалик қилган. Боксчининг энг йирик ғалабаларидан бири 2014-йилда Японияда қўлга киритилган бўлиб, ўшанда у Тейру Киношитани очколар ҳисобида мағлуб этиб, ИБФ йўналиши чемпионига айланган эди.

Шунингдек, боксчи 2017-йилда Сибонисо Гоняга қарши кечган чемпионлик жангининг 11-сониясидаёқ рақибини нокаутга учратган. Бу Жаҳон чемпионлиги жанглари тарихидаги энг тезкор нокаут сифатида эътироф этилади. Тетенинг профессионал фаолияти 29 та ғалаба (шулардан 22 таси нокаут) ва 4 та мағлубият билан якун топди.

У сўнгги бор 2022-йилнинг июл ойида Лондондаги “Уембли” аренасида британиялик Жейсон Каннингемга қарши рингга кўтарилган эди. Бироқ кейинчалик ундан олинган допинг-тест ижобий натижа бергани сабабли жанг натижаси бекор қилиниб, Тетега тўрт йиллик дисквалификация белгиланган. Тақиқланган моддани қасддан қабул қилмаганини доимо таъкидлаб келган боксчининг жазо муддати жорий йилнинг июл ойида якунига етган ва у рингга қайтишга тайёргарлик кўраётган эди.