Йилнинг энг сердаромад теннисчилари эълон қилинди — Форбес

Форбес журнали йилнинг энг кўп даромад олган теннисчилари рўйхатини эълон қилди. Унга кўра, беш карра "Катта дубулға" чемпиони ва дунёнинг биринчи рақамли теннисчиси, италиялик Янник Синнер 58 миллион доллар билан биринчи ўринни эгаллади. Бу сумманинг 23 миллион доллари турнирлардаги мукофот пулларидан иборат.

Кучли учликдан испаниялик Карлос Алкарас 53,7 миллион доллар (шундан 15,7 миллион доллари мукофот пули) ва америкалик Серена Уилямс 40,1 миллион доллар (0,1 миллион доллари мукофот пули) билан жой олди.

Форбес талқинига кўра, 2026-йилнинг энг кўп даромад олган 10 нафар теннисчиси қуйидагилар:

1. Янник Синнер (Италия) — 58 млн доллар (23 млн доллар — мусобақа мукофот пуллари);

2. Карлос Алкарас (Испания) — 53,7 млн доллар (15,7 млн доллар);

3. Серена Уилямс (АҚШ) — 40,1 млн доллар (0,1 млн доллар);

4. Арина Сабаленка (Беларус) — 36,1 млн доллар (13,1 млн доллар);

5. Кори Гофф (АҚШ) — 35,5 млн доллар (7,5 млн доллар);

6. Новак Жокович (Сербия) — 30,2 млн доллар (5,2 млн доллар);

7. Чжен Синвен (Хитой) — 22,6 млн доллар (0,6 млн доллар);

8. Ига Швёнтек (Полша) — 20,5 млн доллар (5,5 млн доллар);

9. Александр Зверев (Германия) — 18,7 млн доллар (13,7 млн доллар);

10. Елена Рибакина (Қозоғистон) — 17,4 млн доллар (11,4 млн доллар).

Қайд этиш жоизки, Карлос Алкарас жароҳати туфайли мавсумнинг катта қисмини, жумладан, "Ролан Гаррос" ва "Уимблдон" турнирларини ўтказиб юборган эди.

Серена Уилямснинг профессионал теннисга қайтиши натижасида теннис тарихида илк бор энг кўп даромад олган 10 нафар теннисчи орасида аёллар сони эркаклардан кўпроқ бўлди. Форбес маълумотларига кўра, кучли ўнталик вакиллари сўнгги бир йил ичида жами 333 миллион доллар ишлаб топган.

23 ёшли Алкарас сўнгги 12 ойда реклама шартномалари, турли тадбирлардаги иштироки, кўргазмали учрашувлар ва бошқа тижорий фаолияти орқали тахминан 38 миллион доллар даромад олган. Синнернинг кортдан ташқаридаги даромади эса 35 миллион долларга баҳоланган.

Бироқ турнирлардаги мукофот пуллари ҳам қўшиб ҳисобланганда, Синнер етакчиликни қўлга киритди. 2025-йилги АҚШ Очиқ чемпионатидан буён италиялик теннисчи жами 58 миллион доллар ишлаб топган. Бу Алкараснинг 53,7 миллион долларлик кўрсаткичидан қарийб 3,5 миллион долларга кўпдир.

АТП рейтингида дунёнинг биринчи рақамли теннисчиси бўлиб турган Синнер Форбесънинг йиллик даромадлар рейтингида 19 йил ичида биринчи ўринни эгаллаган тўртинчи теннисчига айланди. У кетма-кет икки йил ушбу рейтингда етакчилик қилган Алкарасни ортда қолдирди.

Унгача Новак Жокович 2023-йилда рейтингда биринчи бўлган, Рожер Федерер эса 15 йил давомида кетма-кет етакчилик қилган. Швейсариялик теннисчи 2022-йилда фаолиятини якунлаган.

Синнернинг кортдаги 23 миллион долларлик даромади Форбес рейтинги тарихидаги энг юқори кўрсаткич бўлди. Ушбу сумма АТП турнирларидаги мукофот пуллари ҳамда тур томонидан берилган бонусларни ўз ичига олади.

Бу натижа айниқса эътиборга молик, чунки Синнер Уимблдон олдидан бир ой танаффус қилган ва кейинчалик тиззасидаги жароҳат сабаб кортга чиқа олмаган.