“Телевидениени ҳаётимдан ўчирдим”. Турк актёри Ўзжан Дениз телесериалларда бошқа суратга тушмаслигини маълум қилди
54 ёшли актёр ушбу қарорини Анталия халқаро кинофестивали доирасида бўлиб ўтган “Сўнгги кечки овқат” филмининг премьерасида билдирган.
“Телевидениени ҳаётимдан ўчирдим”. Турк актёри Ўзжан Дениз энди телесериалларда суратга тушмаслигини айтди
Машҳур турк актёри ва хонандаси Ўзжан Дениз телесериаллар йўналишидаги фаолиятини бутунлай якунлаганини билдирди. У ижоди давомида кўплаб лойиҳаларда, жумладан томошабинларга яхши таниш бўлган “Истанбуллик келин” ва “Алвон ғунчалар” сериалларида бош ролларни ижро этган.
54 ёшли актёр бу қарорини Анталия халқаро кинофестивали доирасида ўтказилган “Сўнгги кечки овқат” филмининг премьерасида маълум қилди. Янги бадиий филмда у актриса Ойку Караел билан бирга суратга тушган.
Турк актёрининг телесериалларни тарк этиш сабаби
Ўзжан Денизнинг айтишича, бугунги кунда телевидениеда эркин контент яратиш тобора қийинлашиб бормоқда, муаллифлар ва актёрлар эса доимий равишда чекловларни ҳисобга олишга мажбур бўлмоқда.
“Мен телевидениени бутунлай тарк этдим, чунки у ердаги вазиятни тартибсиз деб биламан. Қолаверса, бугунги кунда талаб қилинаётган контентни яратишнинг ортиқ имкони йўқ. Кино эса телесериаллардан кўра самимийроқ ва ҳақиқийроқ, телевидение эса анча эҳтиёткорликни талаб қиладиган майдондир”, дейди актёр.
Унинг аниқлаштиришича, бу қарор фақат телевидениега тааллуқли бўлиб, у актёрлик фаолиятини умуман тўхтатмаган. У эътиборини кинематографияга қаратиб, катта экранларда янги роллар ижро этишни режалаштирмоқда.
Ўзжан Дениз ўз меҳнат фаолиятини дастлаб 1990-йилларнинг бошларида поп қўшиқчиси сифатида бошлаган. Кейинчалик актёрликка ўтиб, бир қатор телесериаллар ва филмларда суратга тушди.
2002-йилда эфирга узатилган “Ишкомли уй” сериали унинг актёрлик фаолиятидаги муҳим бурилиш нуқталаридан бири бўлди. Шундан сўнг у “Июн оқшоми” лойиҳасида ва халқаро миқёсда машҳурлик келтирган “Истанбуллик келин” сериалида Фарук Боран образини гавдалантирди. Актёр қатнашган ушбу сериаллар нафақат Туркияда, балки бир қатор хорижий давлатларда ҳам намойиш этилган.
“Алвон ғунчалар” сериали актёрнинг телевидениедаги сўнгги чиқиши бўлди. Эндиликда у фақат киноларда суратга тушишни давом эттиришни мақсад қилган.