Туркиядан кўчиб кетган турдизи юлдузлари ҳозир қаерда яшайди?

Туркия сериалларининг машҳур юлдузлари ҳозир қаерда истиқомат қилмоқда?

Турк актёрлари, ўзларининг юксак шуҳратига қарамай, оддий инсонлар каби ҳаёт кечиришади. Улар нафақат саёҳат қилишлари, балки бир жойдан иккинчи жойга кўчиб ўтишлари ҳам мумкин. Қуйида хорижга кўчиб ўтишга қарор қилган ва ҳозирда икки мамлакатда яшаётган айрим турк актёрлари ҳақида маълумот берамиз. Шуни таъкидлаш жоизки, уларнинг ҳеч бири ўз ватанини ёмонламаган.

**Меҳмет Гунсур**

Меҳмет Туркияда туғилиб ўсган ва таълим олган. Бироқ, фаолиятининг бошида у кўпроқ Италияда суратга тушган. Айнан шу мамлакатда у бўлажак рафиқаси Катерина Монжио билан танишган. Оилавий ҳаёт қуришга қарор қилган жуфтлик доимий равишда Италияда яшашга келишиб олган. Шу билан бирга, уларнинг Туркияда ҳам шахсий мулки бор. Меҳмет ватанига нафақат янги филмларда суратга тушиш, балки оиласи ва дўстлари билан учрашиш учун ҳам тез-тез келиб туради. Улар Катерина билан бирга уч фарзандни – қизлари Мая ва Хлоя ҳамда ўғли Алини тарбияламоқда. Турк актёрининг ўзи аввалроқ бир неча бор Туркияни ҳамиша ўз ватани деб билишини, бироқ оилавий қулай ҳаёт учун Рим унга кўпроқ мос келишини айтган эди.

**Жан Яман**

Жан Яман сўнгги бир неча йилдан бери Италияда бахтли ҳаёт кечирмоқда. У халқаро лойиҳаларда фаол иштирок этмоқда, турли тадбирларда қатнашмоқда ва кўчиб ўтганидан заррача ҳам афсусланмайди. Айрим турк журналистлари актёрни ватанини менсимаётганликда айблашга уринган бўлса-да, у бундай гап-сўзларни кескин рад этади. Жан ҳар доим ўз мамлакатини севишини ва у билан алоқаларни узиш нияти йўқлигини таъкидлайди. Иши ниҳоятда тиғиз бўлишига қарамай, Туркияга мунтазам келиб туради, чунки бу ерда унинг оиласи яшайди ва кўплаб яқин танишлари бор.

**Марям Узерли**

Баъзан ижтимоий тармоқларда Марям шаънига ёзилган салбий изоҳларга кўз тушади. Айрим фойдаланувчиларнинг таъкидлашича, “Муҳташам юз йил” юлдузи энди йирик лойиҳаларда бош ролларни ололмаслигини англаб етгач, Туркияни тарк этган. Аммо бундай шарҳловчилар гоҳида Узерлининг Германияда туғилиб ўсганини бутунлай эътибордан четда қолдиришади. У Туркияда айнан “Муҳташам юз йил” сериали суратга олинаётган пайтда яшай бошлаган, биринчи қизи туғилишидан олдин эса яна Германияга қайтиб кетган. Айни пайтда актриса ҳақиқатан ҳам икки мамлакатда яшаб, фаол ижод қилмоқда. Сўнгги пайтларда Марям ўз ҳаёти ва режалари ҳақида жуда кам сўзлайди, бироқ ўзини севадиган ва ўзи ҳам севса арзийдиган инсонни учратишни орзу қилишини яширмайди.

**Ҳалит Эргенч ва Бергузар Корел**

2022-йил январ ойида Ҳалит ва Бергузар Лондондан уй сотиб олганини ва фарзандлари билан ўша ерда яшашини маълум қилди. Ўшанда турк сериаллари ишқибозларининг айримлари Эргенчни мамлакатдан қочишда айблади. Бироқ актёрлар шунчаки икки мамлакатда яшашни режалаштирганини айтишди. 2024-йил ёзида Ҳалит ва Бергузарнинг фарзандлари билан Туркияга доимий яшаш учун қайтгани маълум бўлди. Турк сериаллари юлдузлари Англиядаги кўчмас мулкидан воз кечгани йўқ – улар бўш вақтларини у ерда ўтказишмоқда. Шу билан бирга, Эргенч ҳам, Корел ҳам турк филмлари ва сериалларида фаол суратга тушишда давом этмоқда.

**Али Атай ва Ҳазал Кая**

2026-йилнинг ёзида Ҳазал Кая кутилмаган хабар билан мухлисларини ҳайратда қолдирди. Турк актрисаси оиласи билан Нидерландияга кўчиб кетаётганини маълум қилди. Орадан бир неча кун ўтиб, Али Атай рафиқасининг сўзларини тасдиқлади ва улар бу қадамни анча вақтдан бери режалаштириб келаётганини айтди. Улар бу кўчиш иш билан боғлиқлигини таъкидлади: машҳурлар халқаро лойиҳалар билан шуғулланувчи компания очмоқда. “Бу икки шаҳарда яшаш дегани. Халқаро лойиҳалар билан шуғулланиш учун у ерда ўзимиз орзу қилган компанияга асос солдик”, деган Ҳазал.