Собиқ президент Конго Демократик Республикасининг янги исёнчилар коалицияси етакчиси этиб тайинланди
Жозеф Кабила аввалроқ Конго ДР шарқининг катта қисмини назорат қилувчи "М23" исёнчилари билан алоқаси борлигини инкор этган эди.
Собиқ президент Конго ДР янги исёнчилар коалициясининг етакчиси этиб тайинланди
Жозеф Кабила 2001 йилдан 2019 йилнинг январь ойигача Конго ДР президенти бўлган
Конго собиқ президенти Жозеф Кабила ҳукуматни ҳокимиятдан четлатишни хоҳлаётганини айтаётган янги исёнчилар коалициясининг раҳбари этиб тайинланди.
Миллатни қайта тиклаш фронти (FRN) Конго Демократик Республикасидаги «тиранлик»ка чек қўйиш учун «каршилик кучлари»ни бирлаштириш ниятида эканини билдирди ва бу мақсадга «барча воситалар, жумладан, куч ишлатиш орқали» эришишини айтди.
Душанба куни унинг ташкил этилгани эълон қилиниши Кабиланинг давлатга хоинликда айбланиб, сиртдан ўлим жазосига ҳукм қилинганидан бир йил ўтиб, қуролли ҳаракатда бевосита иштирок этаётганининг энг кучли белгисидир. Бундан олдин у М23 исёнчи гуруҳи билан ҳар қандай алоқадорликни рад этган эди.
Конго ҳукумати бунга изоҳ бермади.
Коалиция Конго ДР шарқидаги энг йирик шаҳар бўлган ва ўтган йилдан бери М23 назоратида бўлиб келаётган Гома шаҳридаги Кабиланинг хонадонида ўтказилган матбуот анжуманида таништирилди.
М23 етакчиси Султани Макенга янги ҳаракатда Кабиланинг тўрт ўринбосаридан бири бўлади. Қолган уч нафари ҳам ўтган йили Конго ДРнинг фойдали қазилмаларга бой шарқий қисмининг катта ҳудудини эгаллаб олган AFC-M23 альянсига мансубдир.
Янги гуруҳ ҳақидаги эълон Кабила Конго халқи ўз мамлакатини «қутқариш» учун қандай ҳаракат қилиши кераклигини тушунтиришини айтган нутқидан бир неча кун ўтиб янгради.
Жума куни Кабила президент Феликс Чисекеди ҳукуматини ўтган йили у томонидан илгари сурилган, жумладан, Конго ДР шарқидаги низони ҳал қилишга қаратилган таклифларни эътиборсиз қолдирганликда айблади.
Кабила, шунингдек, ҳукуматни конституциявий тартибни заифлаштирганликда, иқтисодиётни ёмон бошқарганликда ва хавфсизликни таъминлай олмаганликда айблади. У сиёсий мухолифлар ва ҳарбий офицерларнинг ўзбошимчалик билан ҳибсга олинаётганини ҳам даъво қилди.
Ҳукумат ушбу айбловларга ошкора жавоб бермади.
55 ёшли Кабила Конго ДРни 2001 йилдан 2019 йилнинг январь ойигача, баҳсли сайловлардан сўнг Чисекеди ҳокимиятга келгунига қадар бошқарган.
Собиқ президент бир неча йил давомида жамоатчилик эътиборидан четда юрган эди, аммо охирги пайтларда ўз издошининг маъмуриятини очиқдан-очиқ кескин танқид қила бошлади.
Янги коалициянинг тузилиши ўнлаб йиллар давомида зўравонликлардан азият чекиб келаётган мамлакатдаги нозик бир пайтга тўғри келмоқда.
Этник адоват ҳамда сиёсий таъсир ва қимматли табиий ресурслар назорати учун курашлар фонида Конго ДР шарқида 100 дан ортиқ қуролли гуруҳлар фаолият юритмоқда.
Чисекедининг иккинчи муддати 2028 йилда тугайди, аммо май ойида у можаро сабабли ўшанда ўтказилиши керак бўлган сайловлар бўлиб ўтмаслиги мумкинлигини айтган эди.
У, шунингдек, «агар халқ хоҳласа», учинчи муддатга ўз номзодини қўйиши мумкинлигига шама қилди.
Парламент шундан бери конституциядаги икки муддатли чекловни бекор қилиш бўйича референдумга йўл очиши мумкин бўлган қонун лойиҳасини маъқуллади.
Ўтган ойда расмийлар пойтахтда таклиф қилинаётган ўзгаришларга қарши намойишга чиққан эътирозчилар билан тўқнашди.