Косовонинг собиқ президенти уруш жиноятлари учун 25 йилга озодликдан маҳрум этилди

Косовонинг собиқ президенти уруш жиноятлари учун 25 йилга озодликдан маҳрум этилди

Косовонинг собиқ президенти Хашим Тачи уруш жиноятларида айбдор деб топилиб, 25 йиллик қамоқ жазосига ҳукм қилинди.

Чоршанба куни Гаагада бўлиб ўтган суд мажлисида 58 ёшли собиқ президент Косовонинг 1990-йилларда Сербияга қарши мустақиллик уруши пайтида содир этилган жиноятлар учун ҳукм қилинди. Ушбу можарода 10 000 дан ортиқ киши ҳалок бўлган эди.

Уч йил давом этган суд жараёнидан сўнг, у қотиллик, ноқонуний ҳибсга олишлар, қийноқлар ва шафқатсиз муомала каби жиноятларда айбдор деб топилди. Унга қўйилган бошқа бир қанча айбловлар ўз исботини топмади.

Тачи мустақиллик учун курашган Косово озодлик армияси (КОА) ҳаммуассиси ва қўмондони бўлган. У Косовода қаҳрамон сифатида кўрилади.

У 100 га яқин одамни ўлдиришда ва бошқа ваҳшийликларни, жумладан, одамларни мажбурий ғойиб қилишни амалга оширишда айбланган эди.

Тачи шунга ўхшаш айбловларга дуч келган КОАнинг яна уч нафар собиқ қўмондони билан бирга суд қилинди.

Косово озодлик армияси (КОА) 1990-йилларнинг бошларида ўша пайтдаги Сербия провинциясида этник албанларнинг жангари гуруҳи сифатида ташкил этилган бўлиб, уруш пайтида минтақадаги этник серб озчилигига қарши ҳужумлар уюштирганликда айбланади.

Тачи 2008 йилда мамлакат мустақиллигини эълон қилганида Косовонинг биринчи бош вазири бўлди. Кейинчалик у президент сифатида фаолият юритди, аммо 2020 йилда Гаагадаги айбловларга жавоб бериш учун истеъфога чиқди.

Косовода минглаб одамлар ҳукм эълон қилинишини катта экранларда томоша қилиш учун йиғилдилар.

Пойтахт Приштинада олинган фотосуратлар ва видеоларда одамлар ҳукмни эшитиб, кўз ёши тўкаётгани акс этган.