Сирдарёда боғча ходимларини мажбурий меҳнатга жалб қилган раҳбар 20,6 млн сўм жаримага тортилди
Сирдарёда боғча ходимларини мажбурий меҳнатга жалб қилган раҳбар 20,6 млн сўм жаримага тортилди
Сирдарё вилоятидаги давлат мактабгача таълим ташкилотларидан бирида ходимларни мажбурий меҳнатга жалб қилиш ҳолати фош этилди.
Омбудсманга фуқаро Д.С. мурожаат қилиб, ушбу ташкилотда ходимлар мажбурий меҳнатга жалб қилинаётгани бўйича амалий ёрдам сўраган.
Мурожаат омбудсман назоратига олиниб, ҳолат унинг Сирдарё вилоятидаги минтақавий вакили томонидан Давлат меҳнат инспексияси иштирокида ўрганилди.
Текширув жараёнида бир нечта ходим ташкилот биноси ва ҳовлисида қурилиш ишлари якунидан кейинги тозалаш ишларига жалб қилингани маълум бўлди. Бундан ташқари, ходимлар “Ташаббусли бюджет” порталидаги лойиҳага овоз йиғишга ҳам мажбуран сафарбар қилинган.
Давлат меҳнат инспексияси ушбу ҳолатларда мажбурий меҳнатга йўл қўйилганини ва Меҳнат кодексининг 5-моддаси талаблари бузилганини аниқлади.
Шу сабаб мактабгача таълим ташкилоти раҳбари Г.А. Маъмурий жавобгарлик тўғрисидаги кодекснинг 51-моддаси 1-қисмига (меҳнатга маъмурий тарзда мажбурлаш) асосан БҲМнинг 50 баравари — 20,6 млн сўм миқдорида жаримага тортилди.