Сирдарё вилоятида мактаб ўқувчисининг онаси дарс вақтида унинг синфдошига ҳужум қилди
Сирдарё вилоятида мактаб ўқувчисининг онаси дарс пайтида унинг синфдошига ҳужум қилди
Яқинда ижтимоий тармоқларда Сирдарё вилоятидаги мактаблардан бирида ўқувчи қизнинг онаси унинг синфдошига нисбатан куч ишлатгани ҳақида маълумот тарқалди. Вазият болалар омбудсмани эътиборини тортди.
Олий Мажлиснинг Бола ҳуқуқлари бўйича вакили матбуот хизмати хабар беришича, 7 сентябрь куни дарс пайтида икки нафар 13 ёшли ўқувчи қиз ўртасида низо келиб чиққан. Эртаси куни қизлардан бирининг онаси мактабга келиб, низонинг иккинчи иштирокчисини синфдан чақириб чиққан. Суҳбат жанжалга айланиб кетган, шундан сўнг аёл жисмоний куч ишлатиб, вояга етмаган қизнинг бўйин қисмини тирнаб юборган.
Ушбу ҳолат юзасидан Боёвут тумани ички ишлар бўлими томонидан терговга қадар текширув ҳаракатлари олиб борилмоқда. Соғлиққа етказилган шикастланиш даражасини аниқлаш мақсадида суд-тиббий экспертизаси тайинланган.
Бундан аввал болалар омбудсмани ва ҳуқуқ-тартибот идоралари пойтахтдаги мактаблардан бирида учинчи синф ўқувчиси темир билакузукни ютиб юборишга мажбурлангани билан боғлиқ вазиятни назоратга олган эди. Бола жонлантириш бўлимига ётқизилган, шифокорлар унда мураккаб операция ўтказишган.