«Сирдарё-2» электр станцияси шу қишда Ўзбекистон энергетика тизимини мустаҳкамлашни бошлайди — EDF
Франциянинг EDF компанияси қуввати 1600 МВт бўлган «Сирдарё-2» қурилишини якунламоқда. Компания вице-президентининг сўзларига кўра, станция келаётган қишдаёқ энерготизимни мустаҳкамлашни бошлайди. Худди шундай қувватга эга Сурхондарё ИЭС қурилиши 75 фоизга бажарилган. Шунингдек, Бухоро яқинида шамол электр станцияси лойиҳаси ҳақида эълон қилинди.
«Сирдарё-2» электр станцияси шу қишда Ўзбекистон энергетика тизимини мустаҳкамлашни бошлайди — EDF
Қуввати 1600 МВт бўлган «Сирдарё-2» буғ-газ электр станцияси шу келаётган қишдаёқ Ўзбекистон энергетика тизимини қўллаб-қувватлашни бошлайди.
Бу ҳақда Франциянинг EDF компаниясининг Европа, Яқин Шарқ ва Марказий Осиё бўйича ижрочи вице-президенти Седрик Лебуш 16 октябрь куни президент Шавкат Мирзиёевнинг ёқилғи-энергетика соҳаси инвесторлари билан учрашувида маълум қилди.
«Ҳозирда биз қуввати 1600 МВт бўлган „Сирдарё-2“ буғ-газ электр станцияси қурилишини якунламоқдамиз. Бу қишги мавсумдаёқ ушбу станция мамлакат энергетика тизимини мустаҳкамлашни бошлайди», — деди у «Ўзбекистон 24» телеканали сюжетида.
Лебуш, шунингдек, шериклар Siemens ва Nebras билан биргаликда қуввати 1600 МВт бўлган Сурхондарё буғ-газ электр станциясида қурилиш ишларининг 75 фоизи бажарилганини айтди.
Бундан ташқари, EDF вице-президенти Eolus билан ҳамкорликда Бухоро яқинида қуввати 500 МВт бўлган шамол электр станцияси лойиҳасини амалга ошириш бўйича баённома имзоланганини маълум қилди. Лойиҳа, шунингдек, энергияни сақлаш тизимини яратишни ҳам ўз ичига олади.
EDF, шунингдек, давлат-хусусий шериклик асосида Ўзбекистон электр тармоқларини модернизация қилишда иштирок этишга қизиқиш билдирмоқда.
«EDF электр энергиясини узатиш ва тақсимлашда катта тажрибага эга. Биз давлат-хусусий шериклик асосида электр тармоқларини модернизация қилиш бўйича Ўзбекистон билан ҳамкорлик қилишдан манфаатдормиз», — деди Лебуш.
У, шунингдек, энергетика соҳаси учун мутахассислар тайёрлашда ҳамкорликни кенгайтиришга тайёрлигини билдириб, компаниянинг бу йўналишда аллақачон қўшма лойиҳалари борлигини таъкидлади.
«Сирдарё-2» Сирдарё вилоятининг Боёвут туманида жойлашган. Лойиҳа 2021 йил ноябрь ойида халқаро тендерда ғолиб чиққан Франциянинг EDF, Қатарнинг Nebras Power ҳамда Япониянинг Sojitz ва Kyuden консорциуми томонидан амалга оширилмоқда. Объект ишга туширилганда эълон қилинган маълумотларга кўра, станция қуввати 1573 МВт, лойиҳа қиймати эса 900 млн долларни ташкил этади.
Станциянинг ҳисоб-китоб қилинган йиллик ишлаб чиқариш ҳажми 13 млрд кВт·соатни ташкил этади. 61,7% фойдали иш коэффициенти туфайли йилига 1,1 млрд кубометр табиий газ тежалиши кутилмоқда.
25 сентябрь куни станцияда синов-созлаш ишлари давомида 1600 МВт қувватларнинг фавқулодда ўчиши юз берди. Фавқулодда вазиятларга қарши автоматиканинг ишлаб кетиши бир қатор ҳудудларда электр таъминотида узилишларни келтириб чиқарди. Таъминотни тиклаш учун бошқа станцияларнинг захира қувватлари ва энергияни йиғиш тизимлари жалб қилинди.
Эслатиб ўтамиз, 27 июль куни бўлиб ўтган йиғилишда президент Шавкат Мирзиёев Сурхондарё вилоятида буғ-газ электр станцияси қурилиши учун майдон танланишини танқид қилган эди. Унинг сўзларига кўра, объектнинг нотўғри жойлаштирилиши сабабли газ етказиб беришга қўшимча равишда 300 млн доллар йўналтириш талаб этилади.
Бундан ташқари, масъул шахслар лойиҳа ташаббускори билан тузилган шартнома шартларини етарлича синчковлик билан ўрганмаган, бу эса янги харажатлар хавфини туғдирган. Президент шартнома шартларини қайта кўриб чиқишни топширди.
«Газета» ёзганидек, гап, эҳтимол, Ангор туманида SCE-Quvvat компанияси томонидан амалга оширилаётган қуввати тахминан 1,6 ГВт бўлган станция ҳақида борган. Қурилишнинг бош пудратчиси Хитойнинг POWERCHINA компанияси ҳисобланади. Дастлаб лойиҳа иштирокчилари орасида Nebras Power, Stone City Energy, Siemens Energy ва EDF номлари тилга олинган эди.