Швеция сайловларида сўл блок кичик фарқ билан олдинда
Швецияда парламент ва маҳаллий ҳокимият органларига ўтказилган сайловларда собиқ бош вазир Магдалена Андерссоннинг Социал-демократик ищилар партияси 28,1 фоиз овоз билан етакчилик қилмоқда. Бюллетенларнинг 94 фоизи саналганидан сўнг сўл ва ўнг сиёсий блоклар ўртасидаги фарқ жуда кичиклигича қолмоқда.
Швеция сайловларида сўл блок озгина устунлик қилмоқда
Швецияда 13-сентабр куни ўтказилган парламент ва маҳаллий ҳокимият органлари сайловларининг дастлабки натижалари маълум қилинди.
СВТ телеканали хабарига кўра, бюллетенларнинг 94 фоизи санаб чиқилгач, собиқ бош вазир Магдалена Андерссон етакчилигидаги Социал-демократик ищилар партияси 28,1 фоиз овоз билан пешқадамлик қилмоқда.
Умуман олганда, тўртта сўл мухолифат партияси — социал-демократлар, Сўл партия, «яшиллар» ва Марказ партияси амалдаги бош вазир Улф Кристерссон бощилигидаги ўнг блокдан жуда кичик фарқ билан олдинда бормоқда.
Дастлабки ҳисоб-китобларга кўра, Сўл партия 8,2 фоиз, «яшиллар» 6,1 фоиз, Марказ партияси эса 7,1 фоиз овоз олган.
Ўнг блокда Кристерссоннинг мўътадил консерватив партияси 19,9 фоиз овоз тўплаган. «Швеция демократлари»ни сайловчиларнинг 17,6 фоизи, Христиан-демократларни 6,2 фоизи, Либералларни эса 5,4 фоизи қўллаб-қувватлаган.
Сайловолди сўровлари аввалига сўл блокнинг ишончли ғалабасини башорат қилган эди. Аммо овоз бериш куни яқинлашгани сайин Магдалена Андерссон бощилигидаги мухолифат билан Кристерссоннинг ўнг блоки орасидаги тафовут қисқариб борди.
Социал-демократик партия ўтган бир асрнинг катта қисми давомида Швеция сиёсатидаги етакчи куч бўлиб келган ва ҳозир ҳам мамлакатдаги энг йирик партия ҳисобланади. Сўл блок сайлов кампанияси давомида ижтимоий ҳимоя тизимини кучайтириш ва яшаш харажатлари ошиши билан боғлиқ муаммоларни ҳал этишни ваъда қилди.
Амалдаги бош вазир Улф Кристерссон эса кампанияда ҳукуматнинг уюшган ва зўравонлик билан боғлиқ жиноятчиликка қарши кураши ҳамда миграция сиёсатини қатъийлаштиришига асосий эътибор қаратди.
Швецияда овоз бериш ҳуқуқига эга қарийб 8 млн киши бор. Мамлакат аҳолиси 10,6 млн нафарни ташкил этади. Сайловларда иштирок этиш даражаси одатда 80 фоиздан юқори бўлади.
Овозларнинг қарийб ярми сайлов кунига қадар муддатидан олдин берилган. Якуний натижалар сиёсий блоклар ўртасидаги фарқ жуда кичик бўлгани сабабли алоҳида аҳамиятга эга.