Шотландиядаги оролда 34 йил ичида биринчи чақалоқ туғилди

Шотландиядаги оролда 34 йил ичида илк чақалоқ туғилди

Шотландиянинг чекка Шимолий Роналдей оролида 34 йил давомида биринчи марта чақалоқ дунёга келди. СНН ёзишича, аслида бола Коста-Рикада туғилиши керак эди.

Чақалоқнинг ота-онаси — Элис Трейл Форд ва Хорхе Суарес — йилнинг бир қисмини Шимолий Роналдей оролида, қолган қисмини эса Коста-Рикада ўтказади. Сентябр ўрталарида оила оролга келганида, кутилмаганда тўлғоқ бошланган. Чақалоқ 15-сентябр куни туғилган.

Элис Трейл Форднинг аждодлари Шимолий Роналдей оролини 1727-йилда сотиб олган. Аёл болалигидан бери ҳар йили шу ерга келиб туради.

“Ушбу орол менинг улғайишимда муҳим ўрин тутганини ҳис қиламан. Шунинг учун бу ерда ўзимни оролга энг яқин ва энг кўп боғланган инсон деб биламан”, деди у.

2024-йил маълумотларига кўра, оролда 72 киши яшаган. Ҳозир эса унинг доимий аҳолиси 51 кишини ташкил этади. Шимолий Роналдей оролининг узунлиги қарийб 4,8 километр, эни эса тахминан 3,2 километр.

Қайд этилишича, оролда шифохона ва шифокорлар бўлмагани сабабли у ерда узоқ йиллардан бери бола туғилиши кузатилмаган. Шимолий Роналдейда фақат бир ҳамшира доимий яшайди.