Шимолий Корея сочилувчан жанговар каллакка эга қанотли ракетани синовдан ўтказди
Пхенян янги стратегик қурол ва унинг вертикал зарба бериш имкониятларини синаб кўрди. Экспертлар бу орқали Жанубий Кореянинг қуролли кучлари обьектларига зарба бериш мақсад қилинганини айтди.
Шимолий Корея сочилувчан жанговар каллакка эга қанотли ракетани синовдан ўтказди
Шимолий Корея сочилувчан жанговар каллакка эга стратегик қанотли ракетани синовдан ўтказди. Бу ҳақда 3-ноябр куни мамлакат давлат ОАВ хабар берди, дея маълум қилди Ёнҳап агентлиги.
Ракета созлаш бошқармаси ушбу синовларни 2-ноябр куни амалга оширди. Корея марказий телеграф агентлиги (КСНА) маълумотига кўра, синовдан кўзланган мақсад бундай каллакнинг қуввати ва ракетанинг вертикал зарба бериш қобилиятини баҳолаш бўлган.
“Синовлар янги каллакнинг юқори қувватини кўрсатди. Қанотли ракетага ўрнатилган бу ўртача ҳажмдаги каллак 5-6 гектар майдонни кулга айлантиришга қодир”, дейилади хабарда.
Қанотли ракета тизимлари институти ракетанинг мўлжалланган ҳудуднинг табиий ва географик хусусиятларига мослашганини билдирди. Ташкилот унинг якуний манёвр қилиш имкониятини яхшилаш орқали тик зарба бериш қобилиятини мукаммаллаштирган.
“Хилма-хил қурол тизимларини ишлаб чиқиш зарурати ҳар қачонгидан ҳам долзарбдир. Чунки қуролли кучларимиз мамлакат хавфсизлигини ҳимоя қилиши ва ҳар қандай таҳдидларнинг олдини олиши керак”, деди Ракета созлаш бошқармаси директори.
Бошқарма директорининг айтишича, ўтказилган синовлар мамлакатнинг амалий жанговар қудратини намоён этди.
Шимолий Корея 2026-йил охиригача кассетали жанговар каллакларнинг турли хилларини амалиётга жорий этишга ваъда берган. Мамлакат 31-октябр куни тактик баллистик ракеталарга ўрнатилиши мумкин бўлган кассетали бомбани ҳам синовдан ўтказган эди.
Экспертлар фикрича, КХДР ракетанинг тик зарба бериш имконияти орқали Жанубий Корея кучларининг ерости обьектлари ва туннелга кириш жойларига аниқ зарба беришни мақсад қилган. Бундай нишонларга горизонтал ёки диагонал кўринишда зарба бериш қийин ҳисобланади.
“Бу тортишиш кучининг тезлашувидан фойдаланиб, нишонга урилишдан олдин ракетани тўлиқ тезликка чиқариш орқали вайронкорлик кучини максимал даражага ошириш усулидир”, деди Сеулдаги Корея мудофаа ва хавфсизлик форуми бош котиби Шин Жонг Ву.
Жанубий Корея ҳарбийлари 3-ноябр куни Шимолий Кореянинг ҳар қандай провокацияларига жавоб бериш учун “устунликка эга” имконият ва тайёргарликни сақлаб қолаётганини маълум қилди.
“Ҳарбийларимиз Шимолий Кореянинг 20 йил олдинги технологиясидан ўзиб кетадиган аниқ зарба бериш имкониятлари ва тегишли қурол тизимларини аллақачон ишлаб чиққан ҳамда доимий жанговар тайёргарликни сақламоқда”, деди Бирлашган штаб бошлиқлари қўмитаси матбуот котиби, капитан Жанг До Ёнг матбуот анжуманида.