Шахмат Олимпиадаси. Ўзбекистон Перуни мағлуб этди, Синдаров илк ғалабасини қўлга киритди
Шахмат Олимпиадасининг иккинчи турида Ўзбекистон асосий эркаклар терма жамоаси Перуни 3,5:0,5 ҳисобида мағлуб этди. Жавоҳир Синдаров турнирдаги илк партиясида ғалаба қозонди. Ўзбекистон-2 Жазоирни тор-мор этди — 4:0, учинчи жамоа эса Германияга имкониятни бой берди — 0,5:3,5. Иккита аёллар жамоаси ғалабага эришди.
Шахмат Олимпиадаси. Ўзбекистон Перуни мағлуб этди, Синдаров илк ғалабасини қўлга киритди
17 сентябрь куни Самарқандда 46-Бутунжаҳон шахмат олимпиадасининг иккинчи тури бўлиб ўтди. Ўзбекистоннинг асосий эркаклар терма жамоаси Перу устидан ғалаба қозонди, Ўзбекистон-2 Жазоирни ишончли тарзда мағлуб этди, мамлакатнинг учинчи жамоаси эса турнирнинг асосий фаворитларидан бири — Германияга имкониятни бой берди.
Ҳиндистондаги Global Chess League мусобақасидаги иштирокидан сўнг биринчи турни ўтказиб юборган Жавоҳир Синдаров уйдаги Олимпиадада илк бор майдонга тушди. Иккинчи тахтада у оқ рангли доналарда халқаро мастер Диего Сауль Родри Флорес Кильясни (2398) мағлуб этди.
Биринчи тахтада Нодирбек Абдусатторов Перунинг энг кучли шахматчиси Хорхе Коридан (2575) устун келди.
Ўзбекистонга яна бир очкони Стивен Рохасни (2387) мағлуб этган Шамсиддин Ваҳидов келтирди. Муҳиддин Мадаминов Фернандо Фернандес (2369) билан ўйинни дуранг билан якунлади.
Якуний натижа — 3,5:0,5. Икки турдан сўнг Ўзбекистон асосий жамоаси ҳар икки учрашувда ғалаба қозонди: биринчи куни у Ямайкани 4:0 ҳисобида тор-мор этганди.
Иккинчи эркаклар терма жамоаси Жазоирга бирор очко ҳам бермасдан, кетма-кет иккинчи ғалабасини расмийлаштирди — 4:0.
Жаҳонгир Ваҳидов Адлан Арабни, Муҳаммадзоҳид Суяров — Саад Белуадни, Ортиқ Ниғматов — Ала Эддин Булренсни, Ҳумоюн Бегмуратов — Халил Бенгерабини мағлуб этди.
Биринчи турда Ўзбекистон-2 Афғонистонни 3:1 ҳисобида мағлуб этганди.
Ўзбекистоннинг учинчи терма жамоаси иккинчи турда турнирнинг бешинчи рақамли жамоаси — Германия билан тўқнаш келди. Немис жамоаси 3,5:0,5 ҳисобида ғалаба қозонди.
Винсент Каймер Саидакбар Сайдалиевни, Фредерик Сване — Баҳром Баҳриллаевни, Александр Донченко — Алмас Раҳматуллаевни мағлуб этди. Ўзбекистон жамоасига ягона ярим очкони Расмус Сване билан дуранг ўйнаган Муҳаммадали Абдураҳмонов келтирди.
Биринчи турда Мали устидан қозонилган 3,5:0,5 ҳисобидаги ғалабадан сўнг, бу Ўзбекистон-3 жамоасининг турнирдаги илк мағлубияти бўлди.
Турнирнинг биринчи рақамли жамоаси — АҚШ терма жамоаси иккинчи турда Монголияни қийинчилик билан 2,5:1,5 ҳисобида мағлуб этди.
Фабиано Каруана ва Левон Аронян ўз партияларида ғалаба қозонишди, Ханс Ниманн дуранг ўйнади. Рақибидан рейтинг бўйича деярли 260 пункт устун бўлган Авондер Лян халқаро мастер Итгэлт Хуягцогтга (2435) ютқазиб қўйди.
Биринчи турда америкаликлар Ироқ билан учрашувда ҳам ярим очко йўқотишганди.
Хитой Чилини мағлуб этди — 3:1. Вэй И ва Кун Сянжуй ўз партияларида ғалаба қозонишди, Дин Лижэнь ва Сюй Сянъюй учрашувларни дуранг билан якунлашди.
Украина Эстонияни мағлуб этди — 3:1. Игорь Коваленко, Игорь Самуненков ва Роман Дехтяров ғалаба қозонишди, бироқ Василий Иванчук Илья Сирошга имкониятни бой берди.
Испания Уругвай устидан ғалаба қозонди — 3,5:0,5. Давид Антон Георг Майер билан дуранг ўйнади, қолган учта партияда испанлар ғалаба қозонишди.
Ўзбекистоннинг асосий хотин-қизлар терма жамоаси кетма-кет иккинчи йирик ғалабасини қўлга киритди — бу сафар Эквадор устидан 4:0 ҳисобида зафар қучилди.
Афруза Ҳамдамова Анахи Ортисни, Гулрухбегим Тоҳиржонова — Карла Эредия Серранони, Умида Омонова — Саманта Харамильони, Нилуфархон Имомқўзиева — Арлетт Геррерони мағлуб этди.
Биринчи турда Нафиса Мўминова жамоаси Тринидад ва Тобагони ҳам 4:0 ҳисобида мағлуб этганди.
Иккинчи хотин-қизлар терма жамоаси сўнгги партия якунланишидан олдинроқ Иордания устидан ғалабани таъминлади.
Мадинабону Халилова ва Асал Салимова ўз учрашувларида ғалаба қозонишди, Мумтозбегим Мансурова дуранг ўйнади. Нилуфар Ёқуббоеванинг Жуд Аҳмадга қарши партияси материал тайёрланаётган вақтда давом этаётган эди. Жорий ҳисоб — Ўзбекистон-2 фойдасига 2,5:0,5, шу боис учрашув тақдири ҳал бўлиб улгурган.
Учинчи хотин-қизлар терма жамоаси хабар эълон қилинган вақтда Испания жамоасига 2:1 ҳисобида имкониятни бой бераётган эди.
Қозоғистон терма жамоаси Босния ва Герцеговинани мағлуб этди — 3:1. Меруерт Камалиденова ва Эльназ Калиахмет ғалаба қозонишди, Бибисара Асаубаева ва Зарина Нургалиева дуранг ўйнашди.
Амалдаги олимпия чемпиони Ҳиндистон ҳам Финляндия устидан муддатидан олдин ғалабани таъминлади. Дивья Дешмукх, Вантика Агравал ва Савита Шри ўз партияларида ғалаба қозонишди, Вайшали Рамешбабунинг Анастасия Кейнянен билан учрашуви эса материал тайёрланаётган вақтда давом этаётган эди. Ҳисоб — 3:0.
46-Бутунжаҳон шахмат олимпиадаси Самарқандда 16 сентябрдан 27 сентябргача бўлиб ўтмоқда ва швейцарча тизим бўйича 11 турдан иборат.