Шавкат Мирзиёев ФИФА президентини қабул қилди
Ўзбекистон Президенти Шавкат Мирзиёев 30 сентябрь куни Халқаро футбол ассоциациялари федерацияси (ФИФА) раҳбари Жанни Инфантинони қабул қилди.
Шавкат Мирзиёев ФИФА президенти билан учрашув ўтказди
Суҳбат аввалида ФИФА президенти Ўзбекистоннинг футбол соҳасидаги ютуқларини ҳамда мамлакатимизда спортни ҳар томонлама қўллаб-қувватлашга қаратилган самарали ислоҳотлар натижаларини алоҳида қайд этди.
Муҳокамаларнинг асосий мавзуси Ўзбекистон ва Озарбайжонда йирик ва нуфузли спорт тадбири — 20 ёшгача бўлган ёшлар ўртасидаги футбол бўйича жаҳон чемпионатини ўтказиш бўлди.
Футболни, энг аввало, ёшлар ўртасида оммалаштириш бўйича қўшма дастурларни илгари суришда ФИФА билан самарали ҳамкорлик қилинаётгани катта мамнуният билан таъкидланди.
Томонлар шерикликни янада кенгайтириш, биринчи навбатда, футболни ташкил этиш ва бошқариш тизимини трансформация қилиш, ёш истеъдодларни кашф этишга кўмаклашиш, халқаро даражадаги мураббийлар, ҳакамлар, менежерлар, спорт шифокорлари ва техник мутахассисларни тайёрлаш соҳасидаги масалаларни кўриб чиқдилар.
Ўзбекистонда ФИФАнинг йирик турнирлари ва тадбирларини ташкил этиш, шунингдек, Тошкент шаҳрида федерациянинг минтақавий офисини очишни тезлаштиришга алоҳида эътибор қаратилди.