Шавкат Мирзиёев 5 млн тоннадан ортиқ пахта етиштирган деҳқон ва фермерларни табриклади

Шавкат Мирзиёев 5 млн тоннадан ортиқ пахта етиштирган деҳқон ва фермерларни табриклади

Шавкат Мирзиёев Янги Ўзбекистон тарихида илк бор 5 миллион тоннадан зиёд пахта ҳосили етиштирилгани муносабати билан деҳқон ва фермерлар, кластер ходимлари ҳамда қишлоқ хўжалиги соҳаси вакилларига табрик йўллади.

Президент жорий йилда иқлим ўзгариши билан боғлиқ қийинчиликларга қарамай, пахта ҳосили ёғингарчилик бошланишидан олдин йиғиб олинганини алоҳида таъкидлади.

“Сиз, азизларни Янги Ўзбекистон тарихида илк бор 5 миллион тоннадан зиёд юксак пахта хирмони бунёд этиб, рекорд натижага эришганингиз билан самимий муборакбод этаман. Албатта, сизларнинг фидокорона меҳнатингиз, жасорат ва матонатингиз билан қўлга киритилган бу тарихий ғалаба бутун халқимизнинг ғалабаси. Бу — пахтачилик соҳасидаги Янги Ўзбекистон мўжизасидир”, дейилади табрикда.

Давлат раҳбари эслатишича, собиқ совет даврида, айниқса 1980-йилларда Ўзбекистонда пахта етиштириш учун қарийб 2 миллион гектар ер ажратилган, ўртача ҳосилдорлик эса 30 сентнердан ошмаган.

2000-йилда 1,4 миллион гектар майдонга чигит экилиб, жами 3 миллион тонна пахта етиштирилган. Кейинги йилларда пахта экиладиган майдонлар 38 фоизга қисқартирилган. Шу билан бирга, ўқитувчилар, талабалар, ўқувчилар ва буджет ташкилотлари ходимларини дала ишларига жалб этишга чек қўйилгани қайд этилди.

“Ўтган даврда пахтачиликда ҳосилдорлик 2,7 карра ошиб, 21 сентнердан 56 сентнерга етгани шу борада қандай катта юксалиш йўлини босиб ўтганимизни кўрсатиб турибди”, деди президент.

Шунингдек, сув тежовчи технологияларни жорий этиш ҳисобига сув сарфи 1990-йилларга нисбатан икки баравар камайгани маълум қилинди. Жорий йилда қарийб 400 минг гектар майдонда ўртача 70 сентнер, салкам 70 минг гектарда эса 100–110 сентнергача ҳосил олинган.

Мингга яқин фермер хўжалиги ва кластерлар гектаридан ўртача 100 сентнер ёки ундан юқори ҳосилдорликка эришган. Тўрт мингдан зиёд фермер ҳосилдорликни 60–70 сентнердан, улардан 2,5 минг нафари эса 80 сентнердан оширган. Хусусан, Пахтакор туманидаги Анорбой Эшматов ва Жарқўрғон туманидаги Улуғбек Сўпиев гектаридан 110 сентнердан пахта етиштирган.

Ҳудудлар кесимида Жиззах, Хоразм, Бухоро, Навоий ва Сирдарё вилоятларида ўртача ҳосилдорлик 60 сентнердан ошган. Қорақалпоғистонда эса ҳосилдорлик аввалги йилларга нисбатан 10–15 сентнерга кўпайиб, 400 минг тоннадан ортиқ пахта етиштирилган. Энг кўп пахта етиштирган туман Косон бўлиб, бу ерда 110 минг тонналик ҳосил олинган. Миришкорда 105 минг, Касбида 95 минг, Нишонда 90 минг тонна пахта йиғилган.

Президентнинг маълум қилишича, бу йилги ҳосилнинг 85 фоизи 3 мингдан ортиқ пахта териш машинаси ёрдамида 30–35 кун ичида йиғиб олинган. Жиззах ва Сирдарё вилоятларида пахта теримини механизациялаштириш даражаси 100 фоизга етган. Пахтачиликда рақамлаштириш, дронлардан фойдаланиш ва янги технологияларни қўллаш орқали сарф-харажатлар икки баравар камайтирилгани ҳам таъкидланди.

“Бу йил фермерларимиз пахтадан 13–14 триллион сўм соф фойда олиши кутилмоқда. Шу асосда улар йил бўйи қилган машаққатли меҳнати эвазига муносиб даромад топиши, одамларимизнинг ҳаёти янада обод ва фаровон бўлиши табиийдир”, дейилади табрикда.

Шавкат Мирзиёев келгуси йилда серҳосил уруғлик навлари, агродронлар, сув ва энергия тежовчи технологиялар ҳамда сунъий интеллектдан фойдаланиш имкониятларини кенгайтириш режалаштирилганини маълум қилди.

Ушбу чоралар орқали пахтачиликда ўртача ҳосилдорликни гектаридан 65–70 сентнерга етказиш мақсад қилинган. Президент қишлоқ хўжалигидаги стратегик йўлни амалга оширишда аввало агротармоқда фаолият юритаётган 3,5 миллион нафардан зиёд меҳнаткашга таянилишини таъкидлади.