Сеулдаги Мишлен юлдузига эга ресторан чумолилардан безак сифатида фойдалангани учун жаримага тортилди
Машҳур муассаса эгаси қамоқ жазосидан қутилиб қолди, бироқ у 15 миллион вон (£8,144; $10,965) миқдорида жарима тўлашга мажбур қилинди.
Мишлен юлдузига эга Сеул ресторани чумолилардан гарнир сифатида фойдалангани учун жаримага тортилди
Чумолиларнинг аксарияти АҚШдан, баъзилари эса Таиланддан келтирилган
Икки Мишлен юлдузига эга Сеул ресторани десертларда чумолилардан гарнир сифатида фойдалангани учун жаримага тортилди.
Маҳаллий ОАВ хабарларига кўра, Жанубий Корея пойтахтидаги Evett ресторани эгаси Озиқ-овқат санитарияси тўғрисидаги қонунни бузгани учун 15 миллион вон (8 144 фунт стерлинг; 10 965 доллар), ресторанни бошқарувчи компания эса 10 миллион вон жаримага тортилган.
Чумолилар Жанубий Кореяда инсон истеъмоли учун рухсат этилган 10 та ҳашарот тури қаторига кирмайди. Рухсат этилган рўйхатдан чигирткалар, чигирткасимонлар ва баъзи ипак қуртлари жой олган.
Прокурорлар ресторан эгаси учун бир йиллик қамоқ жазоси ва 20 миллион вон жарима сўраган эди, бироқ судья айбланувчининг ўз айбига иқрор бўлганини ва муқаддам судланмаганини ҳисобга олди.
Шу билан бирга, судья озиқ-овқат стандартлари бузилганидан ташқари, чумолиларда ўтказилган тестлар рухсат этилган меъёрдан юқори бўлган оғир металларни аниқлаганини, бу эса «айбнинг енгил эмаслигини» англатишини айтган.
Ресторан эгаси чумолилар бошқа жойларда истеъмол қилиниши сабабли, Жанубий Кореяда уларни таомга қўшиб тортиқ қилиш тақиқланганидан бехабар бўлганини билдирган.
Уларнинг Evett ресторанида сорбетлар устига сепиладиган гарнир сифатида ишлатилиши Озиқ-овқат ва дори-дармонлар хавфсизлиги вазирлиги томонидан фотосуратлар илова қилинган онлайн шарҳлар топилганидан кейин маълум бўлди.
Вазирликнинг маълум қилишича, ресторан эгаси деярли тўрт йил давомида айрим таомларга «нордон таъм» бериш учун уч-беш донадан чумоли сепиб келган, бу эса гарнир сифатида ишлатилган тахминан 49 000 та чумолини ташкил этади.
Чумолиларнинг аксарияти АҚШдан импорт қилинган, баъзилари эса Таиланддан келтирилган, дейди вазирлик.
Ресторан эгаси улар рестораннинг 15 таомдан иборат менюсининг «кичик бир қисмида» ишлатилганини ва мижозларга чумолисиз муқобил гарнирни танлаш имконияти борлиги айтилганини таъкидлади.
Чумолилар бир қанча Осиё, Африка ва Лотин Америкаси маданиятларида истеъмол қилинади ва баъзан ноёб деликатес сифатида қадрланади. Тўқувчи чумолилар ва уларнинг тухумлари Таиланд ва Камбоджа ошхонасида ишлатилади, Колумбияда эса малика чумолилар худди икра каби юқори баҳоланади.
Мишлен йўриқномаси икки юлдузли ресторанни «аъло даражада таом тайёрлайдиган» ва «бориб кўришга арзийдиган» жой сифатида таърифлайди.